«Чолбон өй күрэһин» саҥа сезона саҕаланна
Балаҕан ыйын 26 күнүгэр Бэчээт дьиэтин Өрөспүүбүлүкэтээҕи медиакиинигэр «Чолбон өй күрэһэ» оонньуу саҥа сезона арылынна. Саха Өрөспүүбүлүкэтин судаарыстыбаннаһын күнүгэр аналлаах түһүлгэҕэ төрөөбүт дойдуларын историятын кэрэхсиир эдэр ыччат кытынна.
Тэрээһин «Саха сирэ судаарыстыбыннас суолунан» диэн лекциянан саҕаланна. Лекцияны суруйааччы, М.К. Аммосов аатынан ХИФУ суруналыыстыкаҕа кафедратын сэбиэдиссэйэ, филология наукатын кандидата Олег Сидоров уонна сурунаалбыт бас эрэдээктэрэ, поэт, публицист Гаврил Андросов аахтылар.
Оонньууга 30 ХИФУ устудьуона күөн көрүстэ. Номоххо киирбит Тыгын Дархантан саҕалаан бастакы президент Михаил Николаевка кэмин хабар ыйытыылардаах оонньууну сурунаалбыт эппиэттиир сэкирэтээрэ Туйаара Павлова ыытта.
I миэстэни пединститут иккис кууруһун устудьуона Варвара Романова ылла. Кини үөрэ-көтө санаатын үллэһиннэ: «Бүгүн олус үчүгэй күрэхтэһиигэ кытынным уонна наһаа элбэҕи саҥаны биллим, көрдүм, иһиттим».
II миэстэни тэҥ очколаах Алена Бехтюева уонна Николай Тимофеев үллэһиннилэр.
III миэстэни медицина институтун устудьуона Анастасия Алексеева ылла. Кыыс бэрт оттомноохтук кэпсэтэр:
«Кырдьыгынан эттэххэ, бастаан лиэксийэни истээри эрэ кэлбитим. Онтон интэриэһиргээммин кыттан көрдүм уонна үһүс миэстэни ылбыппыттан бэйэм да сөхтүм. Уопсайынан, маннык квиз-оонньуу наһаа интэриэһинэй эбит. Өссө да кыттыам этэ диэн санааҕа кэллим».
Ыччаттар тэрийээччилэргэ махтанан туран, инникитин даҕаны маннык туһалаах тэрээһиннэри ыыта туралларыгар баҕардылар.
Күн — сири, «Чолбон» — саханы сырдатар!
Чолбон