«Өрөспүүбүлүкэбит дьаһалтата элбэх оҕолоох дьиэ кэргэҥҥэ өйөбүлэ элбэх»: Юлия Максимова
Балаҕан ыйын 27 күнүгэр Ил Дархан Айсен Николаев өрөспүүбүлүкэ олохтоохторун кытта үс чаастан ордук быһа эфиргэ тахсан кэпсэттэ. Өрүү буоларын курдук, олох бары эйгэтин таарыйар араас ыйытыктар өрөспүүбүлүкэбит бары муннуктарыттан тохтоло суох киирэллэр. Быйылгы эфиргэ 1672 ыйытыы киирбит, диэн «Олох суола» суруйар.
Тыа хаһаайыстыбата, хаарбах дьиэттэн көһөрүү, суолу оҥоруу, тутуу, доруобуйа харыстабыла, газтааһын, субсидиялаах билиэттэр, экология, элбэх оҕолоохторго көрүллэр көмө о.д.а. өрөспүүбүлүкэ олохтоохторун ордук долгутар ыйытыыларга Айсен Сергеевич эппиэтэри биэрдэ.
Эфир кэнниттэн элбэх оҕолоох ыал ийэтэ Юлия Максимова санаатын үллэһиннэ:
— Социальнай ситимнэргэ «Дети столетия» көмө уонна көрүллүбэт буолбут», «Элбэх оҕолоохторго сири биэрии оннугар бэриллэр харчы тохтообут» диэн курдук «сонуннар» тарҕананнар элбэх киһи долгуйар этэ. Айсен Николаев быһа эфиригэр «Дети столетия» тус сыаллаах капиталы биэрии тохтообот диэн эттэ. Өрөспүүбүлүкэбит дьаһалтата элбэх оҕолоох дьиэ кэргэҥҥэ өйөбүлэ элбэх. Ол курдук билигин оҕолорбут оскуолаҕа босхо аһыыллар, коммунальнай өҥөлөр төлөбүрдэриттэн 30% төннөр, босхо сир учаастагын биэрэллэр уо.д.а.
Онон быһа эфири истэн интэриэһиргиир ыйытыыларбытыгар толору хоруйу ыллыбыт.
Галина Долгунова
многодетные семьипрямая линия