«Ил Дархан тыа хаһаайыстыбатыгар сыһыаннаах этиилэрин ордук сэргии иһиттим»

Ил Дархан Айсен Николаев Саха Өрөспүүбүлүкэтин Судаарыстыбаннаһын күнүгэр быһа эфиргэ тахсан аһаҕастык кэпсэтиитэ, нэһилиэнньэ ыйытар боппуруостарыгар чопчу эппиэттэри биэриитэ улахан сэҥээриини үөскэттэ. Ол курдук Бүлүү улууһун “Кыргыдай” ПК салайааччыта Маргарита Афанасьевна Томская санаатын үллэстэн, тыа сирин бүгүҥҥү үлэтин-хамнаһын туһунан маннык кэпсээтэ:

“Тыа хаһаайыстыбатын өйөөһүҥҥэ боломуочуйалары олохтоох бэйэни салайыныы таһымыгар биэрэргэ ылыныллыбыт быһаарыы сөптөөҕүн көрдөрөр, онон биһиги муниципалитеттары өйүөхтээхпит” диэн Ил Дархан быһа эфиргэ бэлиэтээн эппитин олус сэргии иһиттим. Итини сэргэ бу ааспыт нэдиэлэҕэ үүт туттарыытын сыллааҕы былааныгар муниципальнай тэрээһиннэр ортолоругар саамай үчүгэй көрдөрүүлэрдээх бастаан иһээччилэр ахсааннарыгар биһиги, Бүлүүбүт улууһа, 87,9 % көрдөрүүлээх ааттаммытыттан үөрдүм, астынным. Тоҕо диэтэххэ, итиннэ биһиги “Кыргыдай” ПК сайыҥҥы үлэбит түмүгэ эмиэ баарынан киэн тутта санаатым.

Биһиги ПК-быт үлэтин туһунан кылгастык эттэххэ, быйыл сайын от үүнүүтэ мөлтөх буолан, кыстыкка киирэрбитигэр оппут аҕыйах. Үксүгэр үлэһит илии тиийбэт. Кыстыкка хотоннорбут өрөмүөнүгэр кырдьаҕастарбытын көмөлөһүннэрэн, бары туох кыахтаахпытынан саба түһэн, күһүҥҥү үлэни-хамнаһы үмүрүтэ сатыыбыт.

360 сүөһүттэн кыстыкка 270  хаалыа, ону да от тиийиэ суох буоллаҕына көҕүрэтиэхпит. Быйыл кэтэхтэр сүөһүлэрин кыанан көрүнүө суохпут диэн биһиэхэ кыстатарга кэпсэтэ сылдьаллар, отторун биэрэллэр. Үлэһит илии тиийбэтэ атахтыыр, эдэр дьон хотон үлэтигэр сыстыахтарын баҕарбаттар, оттон биһиги көлүөнэ сааһыран иһэбит. Эдэр дьон үгүстэрэ вахтаҕа талаһаллар, хамнастаах диэн.

Кырдьаҕас бэтэрээн үлэһиттэрбитигэр махталбыт муҥура суох, куруук субуотунньук тэрилиннэ да күүс-көмө буола сылдьаллар: Чемпорова Августина Дмитриевна, Алексеева Наталия Степановна, Матвеева Елизавета Ивановна, Катанова Мария Николаевна уо.д.а.

Сайылыкпытын сөргүппүт Катанов Михаил Афанасьевичка махталбыт муҥура суох, күрүө-хаһаа, ньирэй титиигэ саҥаттан туппут  Семенов Александр Егоровичка, Прокопьев Николайга, Мальцев Прокопийга уонна куруутун үлэлэрин быыһыгар көмөлөһөр үлэһиттэрбитигэр махтанабыт, этэҥҥэ, доруобай сылдьан, ити курдук тэрилтэбит сайдарыгар күүс-көмө буола туруҥ диэн баҕа санаабытын тиэрдэбит.

Муза Федорова. 

«Олох суола» хаһыат

УлуусМедиа