Оҕону айылҕаны харыстыырга, үлэ үөрүйэхтэригэр иитии
З.А. Тихонова аатынан «Түөлбэ» оҕо киинэРосприроднадзор тэрийэр«Экология — дело каждого»V төгүлүн ыытыллыбытАан дойдутааҕы оҕо-ыччат бириэмийэтин «Экопроект» номинация кыайыылааҕа буолары ситистэ. Бириэмийэ тулалыыр эйгэни, айылҕаны харыстыырга, экологическай үөрэхтээһиҥҥэ уонна экокультураны киэҥник тарҕатыыга аналлаах интэриэһинэй, ураты идеяларга, көҕүлээһиннэргэ уонна бырайыактарга туһаайыллар.
Бүгүн, алтынньы 1 күнүгэр, М.К. Аммосов аатынан култуура уонна духуобунай сайдыы дыбарыаһыгар, «Экология — дело каждого» V төгүлүн ыытыллыбыт Аан дойдутааҕы оҕо-ыччат бириэмийэтин «Экопроект» номинация кыайыылааҕар Айыллыыта Харатаала кыыһыгар, коллективка Росприроднадзор Саха Өрөспүүбүлүкэтин управлениетын салайааччыта Харон Бекбузаров бырайыак олоххо киириитигэр анаан 250 тыһ. солк. суумалаах бириэмийэни үөрүүлээх быһыыга-майгыга туттарда.
«Детский экологический парк «Юка» при Детском центре «Түөлбэ» им. З.А. Тихоновой» диэн бырайыак ааптарынан киин директорын үөрэх-иитии үлэтигэр солбуйааччы Харатаала Айыллыыта Харатаала кыыһа буолар. «Юка» оҕо экологическай паарката» экологическай үөрэхтээһин кэлим соругун уонна «Эркээйи эргиирэ: оҕо уонна ыччат бэйэтэ сайдар эйгэтин тэрийии» региональнай комплекснай программаны олоххо киллэрии чэрчитинэн оҥоһуллубут бырайыак буолар.
Айыллыыта Харатаала кыыһа, бырайыак ааптара: «Бырайыакпытын дойдубутугар Саха сирин тыйыс тымныытын биллэрбит сэлии оҕотун аатынан «Юка» диэн ааттаабыппыт. Оҕолорбутун сахалыы тыын эйгэтигэр сыһыаран экологическай хайысхалаах. Төрүт үгэстэрин, итэҕэллэрин, култуураларын билэллэригэр туһаайыллар. Кииммитигэр дьоҕус паарка тэрийэн айылҕаҕа харыстабыллаахтык сыһыаннаһарга, үүнээйини, оҕуруот аһын чинчийэргэ, кыыллары көрөргө-истэргэ, үлэ үөрүйэхтэригэр үөрэтэр биир эмиэ хайысхалаахпыт. Бырайыагы тэрийээччи педагог Николай Владимирович көҕүлээһининэн бүтүн коллективынан ылсан оҥорбуппут. Былааммытынан балаҕан тутуута, зоопарка тэрийиитэ киирбитэ. Бириэмийэбит үбэ төһө тиийэринэн олоххо киллэриэхпит. Инникитин өссө даҕаны граннарга, куонкурустарга кыттаммыт үлэбитин салгыахпыт», — диэн санаатын үллэһиннэ.
Семен Аргунов