«Харыстаана» түмсүүгэ махтаннылар

Тааттаҕа Анна Егоровна Никифорова салайааччылаах «Харыстаана» уопсастыбаннай тэриллии байыаннай дьайыыга кытта сылдьар уолаттарга таҥас тигэн саҕалаабыта үһүс сылыгар барда.

Ити кэм устата амарах сүрэхтээх, сылаас илиилээх Таатта Далбар хотуттара барыта 86 комплект таҥаһы (комплекка 10 таҥас киирэр) сүрүн үлэлэрин таһынан бириэмэни, атын кыһалҕаны умнан туран, биир-биэс хамнаһа суох тигэн хорсун буойуннарбытыгар тиэртилэр. Ытык Күөл нэһилиэгин аҕа баһылыга Егор Павлов дьиэлээн-уоттаан төлөннөөх волонтердарга үлэлиир усулуобуйаларын тэрийбитэ. «Тааттаавтодор» тэрилтэ генеральнай директора Иван Бочонин түөрт иистэнэр массыынаны, биир остуоллаах промышленнай оверлоктуур массыынаны, иискэ туттуллар таҥаһы-сабы, фурнитураны, итиэннэ тахсар атын кыһалҕалары быһаарыыга барыта 477 тыһ. 185 солкуобайдаах көмөнү оҥорон, «Харыстааналар» махталлара улахан.

Алтынньы 2 күнүгэр “Харыстаана” түмсүү волонтердара — Ытык Күөл 2-с уонна 1№-дээх оскуолаларын учууталлара, иитээччилэр, библиотекарьдар о.д.а. сүрүн үлэлэрин, дьиэтээҕи түбүктэрин таһынан дойдубут, көмүскээччилэрбит туһа диэн ис санааларыттан сылааһы хааччыйар олус наадалаах үлэлэрин, гражданскай көрүүлэрин, патриоттуу быһыыларын, амарах сүрэхтэрин Таатта улууһун салалтата анаан бэлиэтээтэ.

Таатта улууһун баһылыгын экономикаҕа солбуйааччыта Клавдия Протопопова, Ытык Күөл нэһилиэгин баһылыга Егор Павлов, “Тааттавтодор” генеральнай директора Иван Бочонин «Харыстааналарга» – Александра Андреевна Бочуроваҕа, Галина Афанасьевна Дедюкинаҕа, Светлана Семеновна Мессееваҕа, Марианна Дмитриевна Мочкинаҕа, Анастасия Николаевна Мочкинаҕа, Анастасия Николаевна Оросинаҕа, Саргылана Николаевна Слепцоваҕа, Валентина Николаевна Собакинаҕа, Анна Петровна Ючюгяеваҕа, Аграфена Алексеевна Баишеваҕа, Сардаана Даниловна Репинаҕа махтал суруктары, харчынан бириэмийэлэри, бэлэхтэри туттардылар. Түмсүү салайааччыта Анна Егоровна Никифорова «Таатта улууһун социальнай-экономическай сайдыытыгар кылаатын иһин” бэлиэнэн наҕараадаланна.

УлуусМедиа