Олох-дьаһах туруктаах буоларыгар федеральнай бырайыактар суолталара улаатта
Саха Өрөспүүбүлүкэтин Судаарыстыбаннаhын күнүгэр ыытыллыбыт Ил Дархан быhа лииньийэтигэр үгүс ыйытыы киирбитэ. Онно «Олох-дьаһах инфраструктурата» национальнай бырайыак өрөспүүбүлүкэҕэ төһө көдьүүстээхтик олоххо киирэн үлэлиирин туһунан ыйытыыга Айсен Николаев бу иитинэн туох үлэ-хамнас барбытын, инники былааннары сиһилии ырытан кэпсээбитэ. Эпиир кэнниттэн Чурапчы нэһилиэгин баһылыга Владимир Сивцев тус санаатын «Саҥа олох» хаһыакка үллэһиннэ:
— Онуоха «Куорат табыгастаах эйгэтин оҥоруу» федеральнай бырагыраама чэрчитинэн дьон сынньанарыгар табыгастаах эйгэни тэрийии, тупсарыы хайысхатыгар олохтоох көҕүлээһин быһыытынан, биһиги улууспут киинэ – Чурапчы нэһилиэгэ кыттан, кыайыылаахтар ортолоругар ааттаммытын ахтан ылла, бырайыактар олоххо киириэхтэригэр эрэнэрин биллэрдэ. Биһиги ити бырайыакка кыттан, 66 мөл. солкуобай суумалаах граны ылары ситиспиппит. Итинтэн 50 мөл. солк. үбэ федеральнай бүддьүөттэн көрүллэр, атына регионнааҕы уонна олохтоох бүддьүөттэн тыырыллар. Онон улууспут киинигэр 2026–2027 сылларга Куохара үрэх кытылын тупсарыы үлэтин саҕалыахпыт.
Итинэн сиэттэрэн, куораттарга, тыа сирдэригэр дьон-сэргэ сынньанарыгар, иллэҥ кэмин атаарарыгар анаммыт федеральнай бырайыактар олоххо киирэн, олох-дьаһах туруктаах буоларыгар, кэскиллээхтик сайдарыгар суолталара улаатта. Маныаха Ил Дархаммыт Айсен Сергеевич бу улахан бырайыактары өйөөн, болҕомтотун ууран, Өрөспүүбүлүкэбит сайдыытыгар балысхан үлэни-хамнаһы тэрийэрин биһириибин. Аныгы кэм ирдэбилинэн, олохпут уйгутун тупсарыыга туһааннаах салайааччылар бары бииргэ Ил Дархаммыт тула түмсэн, үлэлиэхпит-хамсыахпыт.
«Саҥа олох» кэр.
Нацпроектпрямая линия