Саха суруйааччылара Россия түүр уонна монгол тыллаах литератураларын антологиятыгар таҕыстылар
Алтынньы 29 күнүгэр П.А. Ойуунускай аатынан Литература музейыгар РФ национальнай литератураларын өйүүр программа чэрчитинэн «Современная литература народов России» серияҕа тахсыбыт «Поэзия и проза тюркских и монгольских народов» антология Москваҕа ОГИ кинигэ кыһатыгар таҕыста.
Бу антологияҕа саха уон бастыҥ суруйааччытын айымньылара бэчээттэнэн таҕыстылар. Бу бырайыагы Москва бөдөҥ поэта Максим Амелин салайар. Маннааҕы сүрүннээччинэн «Саха сирин суруйааччыта» ассоциация бэрэссэдээтэлэ Олег Сидоров буолар. Антологияҕа норуот суруйааччылара Николай Лугинов, Иван Мигалкин, Наталья Харлампьева, Куорсуннаах, Сайа уонна поэттар Умсуура, Гаврил Андросов, Рустам Каженкин, Зинаида Архипова айымньылара киирбиттэр.
Олег Гаврильевич: «Бу антология сахабыт литературата 125 сылыгар тахсыбыта олус бэлиэ түгэн», — диэн үөрүүтүн үллэһиннэ.
Тэрээһиҥҥэ антология эрэдээктэрэ, М. Горькай аатынан Литература институтугар үлэлиир татаар суруйааччыта Алена Каримова видео эҕэрдэнэн кытынна. Кинигэ ОГИ кинигэ кыһатыгар 1000 экземплярынан күн сирин көрбүт.
Олег Сидоров үөрүүлээх быһыыга-майгыга айымньылара киирбит суруйааччыларга антологиялары туттарда.
«Чолбон» сурунаал
Чолбон