“Саха сирин балыга – 2025” дьаарбаҥкаҕа сайыҥҥы балыктааһын бастыҥнара ааттаннылар
Саха сирин балыксыт хаһаайыстыбалара быйыл сайын бултуйдулар. Кинилэр сезон устатыгар 1180 туонна балыгы хаптардылар. Итинэн былырыыҥҥы тустаах көрдөрүүлэрин 25 бырыһыанынан куоһардылар.
Сайыҥҥы балыктааһын түмүгүнэн бастыҥ хаһаайыстыбалары Дьокуускайга ааспыт өрөбүл күннэргэ 15-с төгүлүн ыытыллыбыт “Саха сирин балыга – 2025” өрөспүүбүлүкэтээҕи дьаарбаҥка кэмигэр чиэстээтилэр. Ол курдук, Аллараа Халыматтан “Походскай” ТХПК бастакы, Усуйаана улууһуттан “Усуйаана” ХЭУо иккис, Эдьигээнтэн “Дьүктэ” ТХПК аҕа ууһун общината үһүс истиэпэннээх дипломнарынан наҕараадаланнылар.
Өрөспүүбүлүкэҕэ 443 балыксыттаах 145 биригээдэ үлэлиир. Кинилэр быйыл сыл устата 4 700 туонна балыгы бултуур былааннаахтар. Онон иннилэригэр улахан былааны толорор сорук турар. Мантан хаалбыт ыйдарга аны муус аннынан балыктааһыҥҥа туруннулар.
Быйылгы улахан дьаарбаҥкаҕа Булуҥ, Усуйаана, Эдьигээн, Аллараа уонна Үөһээ халымалартан 18 балыксыт хаһаайыстыба кытынна. Кинилэри сэргэ астыыр-үөллүүр тыа хаһаайыстыбатын кэпэрэтииптэрэ уонна урбаанньыттар бородууксуйаларын батардылар. Күүтүллүбүтүн курдук, үс күн устата салҕанан барбыт атыы-эргиэн кэмигэр 60 туоннаттан тахса сайын-күһүн хаптарыллыбыт сибиэһэй балык атыыланна. Онон сирдэттэххэ, киин куорат олохтоохторо уонна ыалдьыттара хотуттан икки улахан уу аалларынан тиэллэн кэлбит көмүс хатырыктааҕы хамаҕатык ыллылар.
Василий Никифоров
Хаартыскаҕа ТХМ пресс-сулууспатын түһэриилэрэ.
рыба Якутии