«„ЧОЛБОН” АЙАР КЫҺАТА»: устудьуоннар айымньылары илиилэригэр туттулар
Бүгүн, сэтинньи 1 күнүгэр, П.А. Ойуунускай аатынан Литература түмэлигэр «„ЧОЛБОН” АЙАР КЫҺАТА» саҥа бырайыак кыттыылаахтара иккис төгүлүн муһуннулар. Манна «Чолбон» сурунаал проза жанрыгар суруйар ааптардарын сүүмэрдэммит 7 айымньыларын Саха сиринээҕи культура уонна искусство колледжын устудьуоннарыгар үөрүүлээх быһыыга туттардылар.
Бу кэпсээннэринэн устудьуоннар бөлөхтөргө арахсан, Саҥа дьылы көрсө, тэттик уус-уран киинэлэри устуохтара. Оҕолорго биллиилээх киинэ диэйэтэллэрэ Александр Лукин, Иван Семенов уо.д.а. сүбэ-ама буолуохтара.
Санаттахха, «„ЧОЛБОН” АЙАР КЫҺАТА» бырайыак бу сыл алтынньы 24 күнүгэр саҕаламмыта. Бырайыак чэрчитинэн сурунаал ааптардарын айымньылара ырытыллан, чочуллан «Чолбон» сурунаал ахсынньытааҕы нүөмэригэр бэчээттэниэхтэрэ. Итини тэҥэ киинэ буолан, Саҥа дьыллааҕы уһун өрөбүллэргэ «Улус.Медиа» порталга тахсыахтара.
Айар тэрилтэлэр кыттыгас бырайыактара саха литературатыгар уонна киинэтигэр саҥа, сонун тыыны киллэриэхтэрэ.
Чолбон