Майаҕа 96 кыбартыыралаах саҥа дьиэ үлэҕэ киирдэ

Сэтинньи 4 күнүгэр Майа сэлиэнньэтин дьонугар-сэргэтигэр үөрүүлээх түгэн үүннэ. В.Исаев аатынан уулуссаҕа түөрт этээстээх, 96 кыбартыыралаах таас дьиэ үлэҕэ киирэн, олохтоохторго күлүүс туттарыытын үөрүүлээх тэрээһинэ ыытылынна, диэн «Эркээйи» хаһыат суруйар.

Саҥа тутуу дойду Бэрэсидьиэнэ Владимир Путин көҕүлээһининэн үлэлиир «Хаарбах дьиэттэн дьону көһөрүү» бырагырааманан олоххо киирдэ. Баараҕай эбийиэк тутааччытынан Николай Докторов салайааччылаах «Мэҥэ-тутуу» кэпэрэтиип буолар.

Сардаҥа сылыта кууһар чэбдик салгыныгар ыытыллыбыт күүтүүлээх, долгутуулаах күнүнэн тоҕуоруһа мустубут бар дьону алгысчыт Зиновий Игнатьев арчылаата, саҥа дьиэ хаһаайыннарыгар үтүө баҕа санаа сарыалынан аал уоту аһатан арыылаах алаадьынан айах тутта.

Норуоттар сомоҕолоһууларын күнүгэр сөп түбэһиннэрэн ыытыллыбыт икки бүк үөрүүлээх түгэнинэн саҥа дьиэ олохтоохторун улуус баһылыга Дмитрий Тихонов, Саха Өрөспүүбүлүкэтин тутууга миниистирэ Виктор Романов, Ил Түмэн дьокутаата Андрей Находкин, Майа баһылыга Алексей Неустроев, «Мэҥэ-тутуу» кэпэрэтиип дириэктэрэ Николай Докторов эҕэрдэлээтилэр.

Дмитрий Тихонов:

-Дойдубут Бэрэсидьиэнэ Владимир Путин олохтообут «Хаарбах дьиэттэн дьону көһөрүү» бырагырааманан Майаҕа 96 кыбартыыралаах саҥа дьиэ тутуллан, бүгүн үөрүүлээх түһүлгэҕэ муһуннубут. Дойдубут, өрөспүүбүлүкэбит салалтата дьоммут-сэргэбит олохторун таһыма үрдүүрүгэр таһаарыылаахтык үлэлииллэр. Бэлиэ күҥҥэ улуус салалтатын аатыттан «Мэҥэ-тутуу» кэпэрэтиип үлэһиттэригэр махталбытын биллэрэбит. Майабыт, тапталлаах улууспут саҥа тутууларынан сайда, киэркэйэ турдун, улууспут дьоҕурдаах, инникигэ дьулуурдаах, күүстээх ыччатынан алгыстаах аартыга айхалланнын!

Виктор Романов:

— «Хаарбах дьиэттэн дьону көһөрүү» бырагыраама дойду үрдүнэн Саха сиригэр саамай балысханнык ыытыллар. Ый аайы оройуоннарбытыгар, нэһилиэктэрбитигэр саҥа дьиэлэр үлэҕэ киирэллэр. Бу сыл түмүгүнэн, уопсайа өрөспүүбүлүкэбитигэр хаарбах дьиэттэн көһөрүү иэнэ 930000 кыбатыраатынай миэтэрэттэн таҕыста, сыл бүтүөр диэри мөлүйүөҥҥэ тиийиэхтээх, 50000 киһи саҥа дьиэҕэ көстө. Сыл бүтүөр диэри бырагыраама чэрчитинэн 30-ча элбэх кыбартыыралаах дьиэ үлэҕэ киириэҕэ. Түгэнинэн туһанан, «Мэҥэ-тутуу» олохтоох тутуу кэпэрэтиибин үлэһиттэригэр эбийиэктэрин бириэмэтигэр, хаачыстыбалаахтык туттаран иһэллэригэр махтанабын.

Эдуард Федоров, элбэх оҕолоох ыал аҕата, саҥа дьиэ олохтооҕо:

-Биһиги ыал саҥа дьиэҕэ Пионерскай уулууса 3 нүөмэрдээх хаарбах дьиэтиттэн көһөн кэллибит. Бу мин улааппыт дьиэм этэ. Кэргэним уһуйааҥҥа үлэлиир, оскуолаҕа үөрэнэр, уһуйааҥҥа сылдьар кыра оҕолордоохпут. Дьыл-хонук ааһан, дьиэбит олус эргэрбитэ, муостата олус тымныы буолан бука бары унтуунан кыстыырбыт. Саҥа дьиэбит сылааһыттан, сырдыгыттан олус үөрдүбүт. Быраагыраама дьон олоҕун-дьаһаҕын саҥа үктэлгэ, кэрдиискэ таһаарар, сарсыҥҥы күҥҥэ эрэли бэлэхтиир. Онон дойдубут, өрөспүүбүлүкэбит салайааччыларыгар, тутуу хампаанньатыгар махталбытын биллэрэбит.

Бэлиэ түгэҥҥэ «Мэҥэ-тутуу» кэпэрэтиип идэлэригэр бэриниилээх үлэһиттэрэ Александр Васильев, Гаврил Исаков, Ая Птицына, Тимур Болуров, Кирилл Тастыгин, Айнара Кривогорницына, Афанасий Марков үрдүк көрдөрүүлээх үлэлэрин иһин СӨ тутууга министиэристибэтин, улуус, Майа сэлиэнньэтин дьаһалталарын махтал суругунан, грамотатынан наҕараадаланнылар.

Изабелла Романова

УлуусМедиа