«Амгинский ракурс Харысхала» быыстапка Дьокуускайга арылынна
П.А. Ойуунускай аатынан Литература музейыгар норуот суруйааччыта, духуобунас академига, Россия литератураҕа улахан бириэмийэтин лауреата Василий Васильев-Харысхал төрөөбүтэ 75 сылыгар анаан «Амгинский ракурс Харысхала» диэн тиһэх хаартыскаларын быыстапката арылынна.
Сэтинньи 5 күнүттэн ахсынньы 5 күнүгэр диэри литература музейыгар Баһылай Харысхал олоҕун кэрэхсээччилэр төрөөбүт Амматын ытык сирдэригэр түспүт хаартыскаларын көрүөхтэрин сөп.
«Быыстапка норуот суруйааччыта Баһылай Харысхал 75 сылыгар туһаайылынна. Манна барыта 7 хаартыскаҕа кини тиһэх фотосессията – 2020 сыл атырдьах ыйын 10 күнүгэр Амма улууһун Мээндиги уонна Соморсун сирдэригэр түспүт хаартыскалара талыллан киирдилэр. Хаартыскаҕа түһэрээччи мин бэйэм. Ити түһэрии Аммаҕа буолбута мээнэҕэ буолбатах, миигин уонна Гаврил Андросовы кини ити сайын анаан-минээн ыҥыран, бэлиэ сирдэри барытын көрдөрөн, кэпсээн, дьиэтигэр хас да хонукка хонноро сытан, билигин санаатахха, кэриэһин эппит, тиһэх төгүлүн таптыыр Амматын айылҕатын күөнүгэр хаартыскаҕа түспүт уонна дойдутун ытык-кэрэ сирдэрин бэйэтэ хайдах билэринэн кэпсээн хаалларбыт. Быыстапка музей уопсай экспозициятыгар киирэр, онон туспа төлөммөт, музейга киирии билиэтинэн сыаналанар», – диэн литература музейын дириэктэрэ Рустам Каженкин туоһулаата.
ХарысхалЧолбон