Хатастааҕы “Баҕарах” хаһаайыстыба аныгы ирдэбилгэ сөп түбэһэр сыахтаах буойуналанна
Дьокуускай Хатаһыгар урукку сопхуос базатыгар олохсуйан үлэлиир “Баҕарах” ХЭУо-ҕа бэҕэһээ, сэтинньи 7 күнүгэр, күҥҥэ 10 сүөһүнү өлөрөн астыыр-үөллүүр буойуна сыаҕа арылынна.
Онон киин куорат олохтоохторун үүт-эт аһынан хааччыйар хаһаайыстыба “Ас-үөл бородууксуйата куттала суох буолуутун туһунан” Таможня сойууһун тэхиньиичэскэй регламенын ирдэбиллэригэр уонна бэтэринээрийэ быраабылаларыгар сөп түбэһэр сыахтанна.
“Баҕарах” ХЭУо дириэктэрэ Иван Сивцев үөрүүлээх түгэҥҥэ хаһаайыстыба быйыл холмогор боруода ынах сүөһү удьуорун ууһатан тэнитиигэ племенной хаһаайыстыба буолбутун бигэргэтэр Арассыыйа Тыатын хаһаайыстыбатын министиэристибэтин туоһу докумуонун туппутунан киэн туттарын итиэннэ сопхуостар эстибит ыарахан дьылларыгар ыһыктынан кэбиспэккэ, бэриниилээхтик, дьүккүөрдээхтик үлэлээбит бэтэрээннэргэ уонна кинилэр уопуттарын утумнаан иһэр кэлэктиибигэр махтанарын биллэрдэ.
Манна эбэн суруйдахха, омук боруода сүөһүлэринэн үлүһүйүү түмүгэр ыраас хааннаах холмогор боруода дойду үрдүнэн Саха сиригэр эрэ ордон хаалбытын федеральнай чунуобунньуктар, учуонайдар сааҥсыйа саҕаламмытыгар биирдэ билиннилэр.
Аныгы кэм ирдэбилигэр толору эппиэттиир буойунаҕа сүөһү тыыннаах хааман киирэн баран, этэ уонна иһэ-үөһэ бүтүннүү сууйуллан-ыраастанан, эттэнэн-кырбанан, буһарыллара эрэ хаалыар диэри бэлэм ас буолан тахсар.
Ол курдук, сыах эти сойутар-бөһүтэр ыскылааттаах, тоҥорор тэриллээх, суббородуукталары астыыр хостоох, лабораториялаах, үлэһиттэр сынньаналларыгар анал хостоох уонна хочуолунайдаах.
Эбийиэккэ 22 мөл. солкуобай ороскуоттаммытыттан 14,8 мөлүйүөнүн өрөспүүбүлүкэ Тыатын хаһаайыстыбатын уонна аһын-үөлүн бэлиитикэтин министиэристибэтэ, 6,83 мөлүйүөнүн Дьокуускай куорат бүддьүөтүттэн уонна 360 тыһ. солкуобайын “Баҕарах” хаһаайыстыба бэйэтин үбүттэн укпуттар.
Үгэс курдук, саҥа тутуу уһун үйэлээх, дьоҥҥо туһалаах буоларыгар туһуламмыт алгыс кэнниттэн киирэр ааҥҥа туора баайыллыбыт кыһыл лиэнтэни тыа хаһаайыстыбатын уонна ас-үөл бэлиитикэтин миниистирэ Артем Александров, Дьокуускай куорат дьаһалтатын баһылыга Евгений Григорьев уонна “Баҕарах” ХЭУо дириэктэрэ Иван Сивцев быстылар.
Миниистир уонна мэр бу саҥа буойуна киин куорат тыа хаһаайыстыбатын табаарын оҥорооччуларыгар улахан суолталааҕын, оттон туһанааччыларга хаачыстыбаны мэктиэлиирин бэлиэтээтилэр.
Дьокуускай сүөһү, сылгы, сибиинньэ иитэр хаһаайыстыбалара баччаҕа диэри чугастыы Нам уонна Хаҥалас улуустарыгар тиэйэн илдьэн астыыллара. Мантан инньэ хос ороскуотураллара тохтуур.
Дириэктэр Иван Сивцев “Баҕарах” буойуната сүөһүлээх, сылгылаах, сибиинньэлээх ыалларыгар эмиэ өҥө оҥоруоҕун туһунан иһитиннэрдэ.
Санаттахха, тэх. регламент ирдэбилинэн маннык сыахтаах буойунаҕа эрэ өлөрөн астаммыт, бэтэринээрийэ ыспыраапкалаах сүөһү-сылгы этин, буотараҕын ырыынакка, маҕаһыыҥҥа атыыга таһаарар көҥүллэнэр. Дьиэҥ тэлгэһэтигэр өлөрөн астаабыккын олбуоргуттан таһаарыа суохтааххын.
“Баҕарах” ХЭУо Хатаска өссө министиэристибэ өйөбүлүнэн хаһаас оту уурар-харайар тутуу бастакы түһүмэҕин түмүктээн эрэр. Икки ангары туппуттар. Аны уу ситимин тарда сылдьаллар.
Маннык 10 эбийиэги тутуу былааннанар. Барыта үлэҕэ киирдэҕинэ, өрөспүүбүлүкэ тыатын хаһаайыстыбата 5 тыһ. туонна оту хаһаанан, курааннаабыт эбэтэр уу сутугар ылларбыт улуустар хаһаайыстыбаларын хааччыйар кыахтаныаҕа.
Василий Никифоров
Хаартыскаларга ТХАҮөБ министиэристибэтин пресс-сулууспатын түһэриитэ