Үөдэйдэр муус ылыытыгар күрэхтэстилэр
Улуу Кыайыы 80 сылынан уонна Сомоҕолоһуу бырааһынньыгын чэрчитинэн Нам улууһун Үөдэй нэһилиэгэр тэрилтэлэр икки ардыларыгар Ымыйахтаах күөлгэ муус ылыытын күрэҕэ үрдүк таһымҥа ааста диэн кэпсиир «Эҥсиэли» хаһыат.
Маннык күрэх бастакытын Үөдэй нэһилиэгин дьаһалтатын көҕүлээһининэн ыытылынна. Барыта 4 хамаанда илин-кэлин түсүһэн, эрчимнээх хамаанданы тэринэн биир тэтимнээхтик күрэхтэстилэр.
Ол курдук, З.П. Саввин аатынан Үөдэй орто оскуолата, Е.И. Кондакова аатынан эмтиир амбулатория уонна олохтоох баһаарынай чаас, нэһилиэк дьаһалтата, И. Зырянов аатынан культурнай-спортивнай комплекс уонна «Сарыал» сынньалаҥ киин бэрт сэргэх, үрдүк суолталаах күрэххэ кыттыыны ыллылар. Күрэҕи нэһилиэк дьаһалтата, спорт үлэһиттэрэ иилээн-саҕалаан ыыттылар.
Ытыктанар Ымыйахтаах күөлбүт үйэ тухары ыраас уутунан күндүлээн, бу да күҥҥэ анаабыт курдук күммүт уота сандаарыччы тыган сылаас күн буолан биэрдэ.
Муус халыныттан кыттан иҥнибэккэ 4 эр киһи, 1 кэрэ аҥар, ол эбэтэр 5 киһилээх хамаандалар биир тэҥ кээмэйдээх сиргэ хайалара түргэнник мууһу ыларыгар күрэхтэстилэр. Учаастактары жеребьевканан таллылар, дьэ ол кэннэ көхтөөх күрэх саҕаланна.
Муус ылааччылар үлэлииргэ чэпчэки уонна судургу араас туттар тэрили туһаннылар. Кэрэ аҥардар көрөн турбакка аҥаар кырыы үлэлээн кыайар-хотор үлэлэрин барытын оҥордулар.
Түмүккэ Е. Кондакова аатынан эмтиир амбулатория уонна олохтоох баһаарынай чаас холбоһуктаах хамаандата бастаата. Иккис миэстэни З.П. Саввин аатынан Үөдэй орто оскуолата, үһүс миэстэни И. Зырянов аатынан КСК уонна В. Зырянов аатынан «Сарыал» сынньалаҥ киин холбоһуктаах хамаандата инники күөҥҥэ таҕыстылар.
«Саамай эдэр кыттааччы» Алексей Сергеев баһаарынай чаас үлэһитэ уонна «Саамай саастаах кыттааччы» Спиридон Кириллин МАУ АРТ үлэһитэ ааттаннылар. Кыайыылаах хамаандалар 50, 30, 20 лиитэрэ бензинынан наҕараадаланнылар.
Күрэх үгэс быһыытынан сылын аайы ыытыллара былааннанна. Нэһилиэк балаҕаныгар күрэх кыттыылаахтарын итии аһылыгынан күндүлээтилэр.
Ылыллыбыт муус аҕам саастаах соҕотох олорор дьоҥҥо, анал байыаннай дьайыы дьиэ кэргэттэригэр көмө буолуоҕа.
Кыттыыны ылбыт дьон, нэһилиэк олохтоохторо суолталаах уонна тыа сирин олохтоохторун сүрүн дьарыгын көрдөрөр олус наадалаах күрэх диэн үрдүк таһымҥа сыаналаатылар.
Екатерина Эверстова, Үөдэй
Геннадий Игнатьев — Айыы оҕото хаартыскаҕа түһэриитэ