П.А. Ойуунускай “Ааспыт күннэр-дьыллар” диэн ахтыытынан дьүһүйүүнү литература музейыгар бэлэх ууннулар
П.А. Ойуунускай аатынан литература судаарыстыбаннай музейыгар Ил Дархан сүбэһитэ Георгий Никонов айар бөлөх П.А. Ойуунускай “Ааспыт күннэр-дьыллар” диэн ахтыытын дьүһүйүү оҥорон таһаарбыт аудио уонна видеокинигэлэрин үөрүүлээх быһыыга-майгыга бэлэх быһыытынан туттарда.
Платон Алексеевич Ойуунускай уус-уран дириҥ айымньыларын таптаан ааҕаллар, ырыталлар. Ойуунускай сэттис томугар тахсыбыт “Ааспыт күннэр, дьыллар” диэн ахтыытын дириҥ историческай суолтатын бэлиэтээн “Тааттавтодор” генеральнай директора Иван Бочонин ураты суолта биэрэн тиэрдэргэ идея көтөҕөн көҕүлээбитэ.
Онон айар бөлөх тэриллибитэ. Саха театрын киэҥник биллэр артыыстара РФ уонна СӨ үтүөлээх артыыстара Петр Баснаев, Иннокентий Луковцев, СӨ культуратын туйгуна Роман Дорофеев айымньыны уус-ураннык аахпыттара Саха радиотыгар режиссер Анна Пудова, оператор Михаил Эверстов бэлэмнээһиннэринэр радио биэрии буолан истэээччилэргэ тиийбитэ.
Онтон видеограф Дмитрий Никонов айымньылаах үлэтинэн ураты дьүһүйүү буолан тахсыбыта, «Саха” НКИХ ханаалыгар көстүбүтэ, Улус.Медиа ситимнээх изданиеҕа тахсыбыта. Тэрээһин, эфиргэ таһаарыы үлэтин Валентина Бочонина ыыппыта. П.А. Ойуунускай аатынан литература музейын салайбыт саха норуодунай суруйааччыта Николай Лугинов, суруйааччы, “Чолбон” сурунаал бас редактора Гаврил Андросов сүбэ-соргу буолбуттара. Ити курдук СӨ Ил Дарханын сүбэһитэ Георгий Никонов салататынан бу бырайыак олоххо киирдэ, салгыы көрөөччүгэ тиийэ да туруоҕа. Бырайыакка үлэлэспит дьоҥҥо “Тааттавтодор”, генеральнай директор Иван Иванович аатыттан тэрилтэ экономикаҕа солбуйааччыта Роман Ефимов дириҥ махталы тиэртэ уонна махтал суруктары туттарда.
Платон Ойунский