Идэһэ – 2025: Дьокуускайга дьаарбаҥкаҕа 60-тан тахса туонна эт атыыланыаҕа
Бэҕэһээҥҥиттэн, сэтинньи 14 күнүттэн, Дьокуускайга Хомсомуол болуоссатыгар “Идэһэ – 2025” дьаарбаҥка үс күннээх үлэтин саҕалаата. Кыс хаар түһэн, халлаан тымныйан, бэл диэтэр, улахан эбэ тура охсон, көҥүллэнэ илик даҕаны буоллар, өрүс уҥуортан тиийэ идэһэлэрин массыыналарынан туоратаннар, эт атыыта-тутуута биирдэ үллэс гына түстэ.
Дьаарбаҥканы тэрийээччи, “Якутские продукты” ТХПК бэрэссэдээтэлэ Павел Чириков иһитиннэрэринэн, кыттааччы ааспыт сыл баччаларга буолбут дьаарбаҥкатааҕар элбэх. Барыта 34 хаһаайыстыбаттан, тэрилтэттэн сайаапка киирбит.
Онон Павел Петрович тэрээһин иннинэ былырыыҥҥы дьаарбаҥкаҕа 60-ча туонна эт атыыламмыт буоллаҕына, быйыл балачча таһымныан сөбүн сабаҕалаабыта. Итиэннэ сирэй атыылыыр хаһаайыстыбалар ынах сүөһү этигэр сыаналарын 800 – 850 солкуобайга түһэрэн атыылыахтара диэбитэ.
Кырдьык, дьаарбаҥка саҕаламмытын кэннэ билистэххэ, итинник сыанаҕа атыылааччы биир эмэ баар быһыылаах. Сүөһү холо-буута кыстанан сытар буоллаҕына, тыаттан субу аҕалбыттара чуолкай.
Ол эрээри, мин көрдөхпүнэ, атыылааччылар быыстарыгар кыһыны быһа ырыынакка туран эргинэр буоланнар, хайдахтаах даҕаны тымныыттан толлубат, дьон киҥир-хаҥыр саҥатыттан ымыттыбат буолбут сирэйдээх-харахтаах эргиэмсик дьахталлар элбэхтэр.
Кинилэр кырбаһынан атыылыы үөрүйэхтэр. Холобур, Чурапчы сүөһүтүн суон дүлүҥү эрбээбит курдук куҥ этэ 1 200 солкуобайтан саҕаланар.
Өрүс уҥуортан үксэ ынах сүөһү этин аҕалбыттар. Халлаан саҥардыы тымныйан, убаһаны идэһэҕэ дьэ маассабайдык туттан эрэллэр. Ол курдук, Мэҥэ Хаҥаластан, Тааттаттан, Чурапчыттан, Амматтан, Уус Алдантан ким бортобуой УАЗ, ким буханка массыыналарга тиэнэн туораппыттар.
Харса суохтар Павловскай – Хатас аннынан эрэ буолбакка, Сатай утарытынан кытта тахсыбыттар. Кыра массыынаҕа төһөнү хаалыаххыный, онон эрдэ кэлбит атыылаһааччы “тэпсэ сылдьан” талан атыылаһар кыахтаах.
Оттон сыана туһунан эттэххэ, халбархай соҕус. Бүтүн сүөһүнэн-убаһанан дуу, холунан-буутунан дуу атыылаһар буоллаххына – киилэтигэр 8 мөһөөхтөн 9 мөһөөххө диэри, эбэтэр аҕыйах кырбаска – убаһа сыалаах ойоҕоһугар 1 800-2000, эдэр сүөһү куҥ этигэр 1 400 солкуобайга тиийэ сыаналыыллар.
Холобур, Амма Болугуруттан кэлбит дьахтар улахан сүөһү холлорун-бууттарын 9-түү мөһөөххө атыылыыр.
Хайалаах Алтайтан аҕалыллыбыт сүөһү этэ кытта баар. Бэйэ кэлэн, илэ көрөн, этэргэ дылы, сахалыы тутан-хабан атыыласпыта ордук.
Василий Никифоров
Ааптар түһэриилэригэр “Идэһэ – 2025” дьаарбаҥка түгэннэрэ