Бөтүҥҥэ Идэһэ күнүгэр түөлбэлэр күрэхтэрэ сэргэхтик ыытылынна
Амма улууһун В.З. Неверев аатынан Бөтүҥнээҕи элбэх хайысхалаах спорт киинин уораҕайыгар дьон доҕордоһуутун, биир санааланыытын күүһүрдэр «Идэһэ – 2025» диэн бэрт сэргэх тэрээһин ыытылынна. Бу туһунан «Амма олоҕо» хаһыат кэпсиир.
Спортсаала киэҥ уораҕайыгар дьон-сэргэ бэркэ үөрэн-көтөн, бэйэ-бэйэлэрин кытта көрсөн, сонуннарын атастаһан, дуоһуйа кэпсэттилэр. Бу күн нэһилиэк биир күүтүүлээх бырааһынньыга — «Идэһэ — 2025» атыы-эргиэн дэлэй дьаарбаҥката арылынна.
Дьаарбаҥкаҕа ким баҕалаах бэйэтэ бултаабыт булдун, идэһэтин эмис этин, араас минньигэс астарын, кэтэх хаһаайыстыбаларыттан оҥорбут бэйэ бородууксуйатын аҕалан атыылаата.
Манна Н.Е. Иванов аатынан Бөтүҥ орто оскуолата агро хайысхалаах буолан бэйэтэ бэлэмнээбит кытай бэлимиэннэрин, буотарах уонна миин набордарын, тефтель атыыга таһаарда.
Бу сылга ураты бородууксуйанан Татьяна уонна Терентий Сутаковтар дьиэ кэргэннэрэ кытыннылар. Кинилэр сайын устата кичэйэн көрбүт мүөттээх ыҥырыаларын минньигэс мүөттэрэ дьон-сэргэ, сөҕүүтүн-махтайыытын ылла.
Ити курдук дьаарбаҥкаҕа кыттыылаахтара араас эттэн бородууксуйалары, балыгы, оҕуруот аһын, хортуоппуйу уонна да атын аһы-үөлү хото тардан, хас биирдии киһи туох баҕарбытын булан, атыылаһан үөрэн-көтөн дьиэлээтэ.
«Идэһэ — 2025» тэрээһин үөрүүлээх арыллыытыгар «Махтал» норуодунай үҥкүү кэллэктиибэ «Кылыыҥкай» үҥкүүнэн, Егор Никифоров хомус алыптаах дорҕоонунан, «Ситим» фольклорнай бөлөх норуот ырыаларынан эҕэрдэлээтилэр, кэлбит дьону дуоһуттулар.
Бу күн нэһилиэк түөлбэлэрин икки ардыларыгар ыытыллар «Сайдыс – 2025» култуурунай-спортивнай күрэх чэрчитинэн олус кэрэхсэбиллээх уонна көрдөөх «Идэһэ сүпсүлгэнэ» диэн оонньуу күрэҕэ ыытыллынна.
Күрэххэ нэһилиэк түөрт улахан түөлбэтэ, ол курдук «Илин», «Сомоҕо», «Ситим» уонна «Арчы» түөлбэлэр бэйэлэрин күүстэрин, сымсаларын уонна түмсүүлээхтэрин көрдөрдүлэр.
Түөлбэлэр араас көрүҥнээх оонньууларга кытыннылар: «Кутурук сүлээһинэ», «Бурдук кутуута», «Канат тардыһыыта» уонна «Оһоҕос ыраастааһына».
Ыытыллыбыт «Идэһэ сүпсүлгэнэ» күрэҕин түмүгүнэн, «Сомоҕо» түөлбэ — бастаата. Иккис миэстэҕэ «Ситим» түөлбэ, үһүс миэстэ «Арчы» түөлбэ уонна төрдүс миэстэҕэ «Илин» түөлбэ таҕыстылар.
Күрэх кыайыылаахтарыгар уонна кыттыылаахтарыгар эҕэрдэбитин тиэрдэбит. Бу курдук күүтүүлээх «Идэһэ – 2025» тэрээһинэ – норуот үгэстэрин харыстааһын, ыччаты төрүт култуураҕа сыһыарыы уонна дьону биир сомоҕоҕо түмүү чаҕылхай холобура буолла. Маннык үөрүүлээх түгэннэр нэһилиэк сомоҕолоһуутун өссө күүһүрдэн сайдыыга эрэли саҕаллар.
Айталина ИВАНОВА