Николай Сотников турбанан гааһы Бүлүүнү туоратар

Истэргэ соһуччу, ол эрээри улууска киэҥ хайысхалаах үлэнэн дьарыктанар урбаанньыт Николай Сотников гааһы Бүлүү өрүһү туората сылдьар.

«Манныгы толкуйдаабытым ыраатта, ол эрээри, баҕар, көҥүллүөхтэрэ суоҕа диэн санааммын ылсыбакка сылдьыбытым, — диир Николай Сотников. – Ньурбаҕа күһүн-саас хаайтарыы кэмигэр биһиги арыыга олорор курдук буолан хаалабыт, кэлии-барыы, таһаҕас таһыыта тохтуур. Күһүн алтынньыттан ахсынньыга хаһан өрүһүнэн туорааһын көҥүллэниэр диэри улахан уйуктаах массыынанан таһаҕаһы кыайан аҕалбаккын. Бу дьоҥҥо олус эрэйдээх.

Биһиги 2 гаас саппараапкалаахпыт, аны гааһынан сылытыллар (газгольдер) элбэх эбийиэктээхпит. Хаайтарыы кэмигэр гааспыт тиийбэт буолан үгүс ыарахаттары үөскэтэр. Оттон биһиги улахан социальнай суолталаах үлэни толоробут. Сыананы үрдэтээри эҥин буолбакка, элбэх туһанааччыбытын гааһынан сылы эргиччи хааччыйар туһугар, кыһалҕаттан бу бырайыагы толкуйдаабытым.

Бүлүү өрүһү туоратар быстах кэмнээх дьоҕус газопровод экспериментальнай бырайыагын оҥорторбутум. Бу сайын Хабаровскайтан 1,5 км усталаах полиэтилен гаас турбатын ылбыппыт, ол эбэтэр 300-түү миэтирэ усталаах 5 бобинаны. Хонтуруоллуур уорганнары кытта кэпсэтэн, туһааннаах көҥүлү ылбыппыт.

Үлэһиттэрбин кытта Үөһээ Бүлүү аннынан Бүлүү өрүскэ тиийэн үлэлээн, сэтинньи 18 күнүгэр киэһэ гааспыт турбатын туораттыбыт. Гаас турбатын салҕааһына электромуфтовой сварочнай аппараатынан иһэрдиллэр, манна аналлаах электросварной муфта туһаныллар. Гааһы газовозка туруоруллубут «CorkenZ-200» носуос хачайдыыр.

Биир массыына гааһы бырахтардыбыт. Бүлүү эбэ кэтитэ буолан, 10 чаас устатыгар 36 кубометр гааһы бырахтардыбыт. Сарсыҥҥылаан арыый улахан кыамталаах носуоһу туруоран үлэлэтиэхпит.

Бырайыакпыт экспериментальнай, ханна даҕаны маннык туттулла илик эбит. Онон бастакы уопут буолар. Барыта үчүгэйдик сатанан эрэр, Ньурбам дьонун гааһынан ситимин быспакка хааччыйарга улахан хардыы оҥоһулунна диэммин үөрэбин.

Дойдубут киин регионнарыгар бэнсиин кырыымчык буолан эрэр, АЗС-тарга 10-нуу эҥин лиитэрэни эрэ куталлар үһү диэн истэбин. Аны бэнсииммит сыаната мэлдьи үрдүү турарын билэбит. Гааспыт сыаната онно холооотоххо арыый удамыр. Элбэх киһи, үгүс тэрилтэ гааска көстө. Гаас барытыгар үчүгэй эбит, дьиэҕэ оттук эмиэ туһаныллар.

Биһиги тэрилтэбит сайаапканан элбэх эбийиэккэ гааһынан сылыттыыны киллэрдэ, газгольдердары көрөбүт-истэбит. Ньурба патриота буоларым быһыытынан дьонум-сэргэм туһугар үтүө дьыаланан дьарыктанарбыттан үөрэбин уонна астынабын».

Дьэ, урбаанньыт Николай Владимирович Сотников маннык соһуччу уонна үтүө сонуннаах буолан биэрдэ. Киниэхэ ылсыбыт дьыалата ситиһиилээхтик олоххо киирэ турарыгар баҕарабын.

Геннадий АНТОНОВ

УлуусМедиа