Үүнэр көлүөнэ тус сыаллаах пуондатын көҕүлээһининэн «Олоҥхо дойдутугар айан» фестиваль салҕанар
Сэтинньи 20 күнүгэр Хатаска Олоҥхо декадатын чэрчитинэн, «Олоҥхо дойдутугар айан» фестиваль иһинэн, төрдүс төгүлүн ыытыллар «Олоҥхо түһүлгэтэ» (иитээччи оҕолору кытары үгэс быһыытынан олоҥхону куолаан толорууга күөн күрэс) уонна бэйэ оҥоруу «Олоҥхо оонньуулара уонна оонньуурдара» күрэстэр аастылар. Тэрээһин Олоҥхо Аан дойду улуу айымньытынан биллэриллибитэ 20 сылыгар ананна.
«Үүнэр көлүөнэ бэйэтин төрүт үгэстэрин билсэригэр-үөрэтэригэр Олоҥхо сүрүн оруоллаах. Биһиги пуондабыт 2016 сылтан саха култууратын тарҕатыытыгар аналлаах бырайыактарга ураты болҕомтону уурар. Бу сыллар тухары пуонда көмөтүнэн 20-чэ кинигэ суруллан бэчээттэммитэ. Онтон «Олоҥхо дойдутугар айан» фестивалы иккис төгүлүн өйүүбүт», — диэн СӨ Үүнэр көлүөнэтин тус сыаллаах пуондатын генеральнай дириэктэрэ Владимир Егоров бэлиэтээтэ.
«Бу күннэргэ норуоттар икки ардыларынааҕы научнай конференцияҕа араас дойдуттан 20-тэн тахса чинчийээччи биһиги олоҥхобутун хайдах сайыннара сылдьарбытын сэргээн кэлэ сылдьар Абхазияттан, Арменияттан, Монголияттан, Кыргызстантан, ону таһынан Арассыыйа атын эрэгийиэннэриттэн. Кинилэр кыра оҕолортон саҕалаан олоҥхоҕо уһуйар бырайыакпытын сөҕөллөр уонна саамай сөптөөх дииллэр. Бу «Олоҥхо дойдутугар айан» фестивалбытын Үүнэр көлүөнэ тус сыаллаах пуондатын өйөбүлүнэн эһиилгэттэн өссө да дириҥэтиэхпит уонна кэҥэтиэхпит», — диэн Өрөспүүбүлүкэтээҕи «Олоҥхо ассоциацията» уопсастыбаннай тэрилтэ бэрэсидьиэнэ Февронья Шишигина кэпсээтэ.
«Олоҥхо түһүлгэтэ» күрэххэ 11 уһуйаан бөлөхтөрө кыттыыны ыллылар. «Кылаан кыайыылаах» үрдүкү анал ааты Дьокуускай куорат «Уу-чуку-чук» чааһынай уһуйаана ылла. Уһуйаан иитиллээччилэрэ Петр Решетников «Күөнэ көҕөччөр аттаах күүстээх-уохтаах Күн Күндүлү бухатыыр» олоҥхотун толорбуттара. Бөлөх салайааччыта Ксения Лаптева кэпсииринэн, оҕолор бэйэлэрэ олоҥхону кэрэхсииллэр: «Бастатан туран, олоҥхону остуоруйа курдук билиһиннэрэн баран, оруолларынан араартыбыт, ол кэннэ геройдары уруһуйдатабыт, араастан оҥотторобут. Бу оҕолорум үс саастарыттан норуот ырыаларын ыллаан саҕалаабыттара, сценаҕа туттууну-хаптыыны үөрэппиттэрэ. Улаатан истэхтэринэ 5 саастарыттан олоҥхоҕо уһуйан саҕалаабыппыт».
Дьокуускай куорат уонна куорат таһынааҕы нэһилиэктэргэ авторскай оонньуурдар уонна оонньуулар күрэхтэригэр 16 уһуйаантан 76 үлэ киирбит. «Күрэс иккис сылын ыытыллар, бу сырыыга оонньуулар уонна оонньуурдар техническэй оҥоһуга олус тупсубут. Биир оонньуу хас да көрүҥнээх буолуон сөбүн эмиэ кэрэхсии көрдүбүт. Биирдиилээн эрэ оонньуу буолбакка оҕо эйгэтин тэрийиитигэр улахан көдьүүстээх үлэлэри онорбуттар», — диэн Саха сирин уус-уран оҥоһуктарын маастара, Дьокуускай куорат национальнай гимназиятын учуутала, күрэх дьүүллүүр сүбэтин бэрэссэдээтэлэ Айталина Иванова бэлиэтээтэ. Араас хайысхаларынан кыайыылаахтары, призердары быһаардылар.
Тэрийээччилэр:
* СӨ Үүнэр көлүөнэтин тус сыаллаах пуондата;
* Өрөспүүбүлүкэтээҕи «Олоҥхо ассоциацията» уопсастыбаннай тэрилтэ;
* «Арылы кустук» үөрэхтээһин уопсастыбыннай тэрилтэ;
* Өрөспүүбүлүкэтээҕи «Норуот педагогикатын ассоциацията» уопсастыбаннай тэрилтэ;
* Хатастааҕы 70№-дээх уһуйаан;
* Хатастааҕы «Тускул» култуура киинэ.