“Агромотиватор” бырагыраама байыаннай дьайыы кыттыылаахтарын тыа хаһаайыстыбатын үлэтигэр көҕүлүүр аналлаах
Саха Өрөспүүбүлүкэтэ дойду 19 эрэгийиэнин иһигэр хапсан, тыа хаһаайыстыбатынан дьарыктаныахтарын сананар байыаннай дьайыы кыттыылаахтарын федеральнай грант үбүнэн өйүүр “Агромотиватор” бырагырааманы үлэлэтэн эрэр. Тыа хаһаайыстыбатын уонна ас-үөл бэлиитикэтин министиэристибэтэ куонкуруска кыттыан баҕалаах дьонтон сэтинньи 20 күнүттэн ахсынньы 20 күнүгэр диэри докумуоннары электроннай көрүҥүнэн тутарын туһунан биллэрэр.
Куонкуруска кыттааччыттан маннык докумуоннары хомуйан ыытара ирдэниллэр: сайаапка; пааспарын куоппуйата; бырайыагын бизнес-былаана; бизнес-былаанын презентацията; ороскуоттарын былаана; бааҥҥа счетуттан выписка (5 күнтэн бэтэрээ ылыллыбыт); үөрэҕин туһунан диплом куоппуйата; ТХПК чилиэнин быһыытынан чилиэн киниискэтин куоппуйата; бырайыагын олоххо киллэрэригэр туттуллар хамнаабат баайын-дуолун испииһэгин уонна кадастровай нүөмэрдэрин көрдөрөр ыспыраапка; сулууспалаабытын туһунан военкоматтан ыспыраапка.
Грант үбэ куонкуруска олоҕуран, хамыыһыйа быһаарыытынан ананар. Грант кээмэйэ кыттааччы бырайыагын олоххо киллэрэригэр бэйэтиттэн төһөнү угарыттан ааҕан таһаарыллар. Ол гынан баран, бырайыак тыа хаһаайыстыбатын ханнык салаатыгар хайысхаланарыттан эмиэ улахан тутулуктаах. Холобур, ынах сүөһүнү иитиигэ (эт уонна үүт хайысхаларыгар) муҥутаан 7 мөл. солкуобайга диэри ылыахха сөп, ити эрээри, бырайыак бүттүүн ороскуотун 90 бырыһыаныттан тахсыа суохтаах. Ол эбэтэр ороскуоттан 10 бырыһыана (бу балаһыанньа бырайыакка барытыгар сыһыаннаах) – кыттааччы бэйэтин үбэ. Атын хайысхаларга (холобур, оҕуруот аһын үүннэрии, көтөрү иитии) грант муҥутуур суумата – 5 мөл. солкуобайга диэри. Грант алын кээмэйэ 3 мөлүйүөнтэн кыра буолбат.
Грант ылбыт киһи тыа хаһаайыстыбатын бырайыагын олоххо киллэрэр туһугар 3 сыл ньиргиччи үлэлиэхтээх. Итиэннэ гранын суумата 3 мөл. солкуобайтан таһымныыр буоллаҕына, бииртэн аҕыйаҕа суох саҥа үлэ миэстэтин тэрийиэхтээх. Көмө үбү тыа хаһаайыстыбатын тиэхиньикэтин, тэриллэрин, тыа хаһаайыстыбатын кыылын-көтөрүн атыылаһыыга, хотону, күрүөнү-хаһааны тутууга, саҥалыы сөргүтэн оҥорууга, сиэмэни уонна уоҕурдууну атыылаһыыга туттуохха сөп.
“Агромотиватор” түмүгэ бу дьыл ахсынньы 21-22 күннэригэр биллиэҕэ. Бүгүҥҥү, сэтинньи 24 күнүнээҕи туругунан, “Электроннай бүддьүөт” тиһиккэ биир даҕаны сайаапка киирэ илик диэтилэр. Дьиҥинэн, дьон күүскэ өрүкүнэспэттэрэ сөп даҕаны. Быйыл федеральнай бүддьүөттэн баара-суоҕа 9 мөл. солкуобайтан эрэ чорбойор үп тыырыллыбытын хас киһиэхэ үллэриэхтэрэй. Чахчы бэйэлэрин билиммит, өрө тутуллар Арассыыйа дьоруойа ааттаах-суоллаах уолаттар тиксэр-тииһинэр буолуохтаахтар. Эһиил 15 мөлүйүөн көрүллүө үһү. Тыа хаһаайыстыбатын итэҕэһин-быһаҕаһын сэрии уотун ортотунан ааспыт мохсоҕоллорунан саба туттарыахха диэтэххэ, дьэ күттүөнэ суох өйөбүл.
Тыа хаһаайыстыбатын итэҕэһин-быһаҕаһын сэрии уотун ортотунан ааспыт мохсоҕоллорунан саба туттарыахха диэтэххэ, дьэ күттүөнэ суох өйөбүл.
Василий Никифоров
Хаартыска: «Ньурба» хаһыат
Өссө ааҕыҥ: “Хорриот” тиһиккэ киллэрии Саха сиригэр хорутуулаахтык ыытыллыаҕын кэтэх сылгылаахтар харгыстыыллар СВОТыа хаһаайыстыбата