Тыа хаһаайыстыбатыгар үлэлиир дьахталлары министиэристибэ Арассыыйа Ийэтин күнүнэн эҕэрдэлээтэ
Бу нэдиэлэ өрөбүлүгэр Арассыыйаҕа Ийэ күнэ бэлиэтэнэринэн тоҕооһуннаран, Тыа хаһаайыстыбатын уонна ас-үөл бэлиитикэтин министиэристибэтин салалтата тыа хаһаайыстыбатыгар үлэлиир дьахталлары өрөспүүбүлүкэ бырабыыталыстыбатын 2-с дьиэтигэр баар Овальнай саалаҕа мунньан олорон эҕэрдэлээтэ. Үөрүүлээх дьаһалга барыта 19 улуустан уонна Дьокуускай куораттан 100-тэн тахса дьахтар, тыа хаһаайыстыбатын тэрилтэлэрин салайааччылара уонна үлэһиттэрэ, кытыннылар.
Санатыстахха, 2020 – 2021 сылларга ыытыллыбыт Бүтүн Арассыыйатааҕы нэһилиэнньэ биэрэпиһин түмүгүнэн, Саха сиригэр баар дьахтар бүттүүн ахсааныттан үстэн биирэ, 169 тыһ. киһи, тыа сиригэр олороро. Кинилэртэн тыа хаһаайыстыбатын тэрилтэлэригэр 2 280 дьахтар үлэлиирэ, ол эбэтэр агробырамыысыланнас эйгэтигэр хамнаска үлэлиир дьон бүттүүн ахсааныттан 37 бырыһыанын ылара, ону тэҥэ 122 дьахтар салайааччы сололооҕо.
Тыа хаһаайыстыбатын уонна ас-үөл бэлиитикэтин миниистирин бастакы солбуйааччы Анна Стручкова эҕэрдэ тылыгар бүгүн тыа хаһаайыстыбатын тэрилтэлэригэр үлэлиир дьонтон 40 бырыһыана дьахтар аймах буоларын, ону сыыппараҕа таһаардахха, 2 тыһ. кэриҥэ дьахтар үлэлии сылдьарын, кинилэртэн 150-чата салайааччы сололооҕун эттэ. Дьиҥ иһигэр билигин сыыппаралары сыымайдыыр, сааһылыыр, чуолкайдыыр, тэҥнээн көрөн ырытар-ырыҥалыыр исписэлиис биир даҕаны биэдэмистибэҕэ суох быһыылаах. Урут диэххэ, 2022 сыллаахха суруйбут ыстатыйабар “өрөспүүбүлүкэ үрдүнэн отчуот туттаран, нолуок төлөөн, дьиҥнээхтик үлэлии сылдьар 2 тыһыынча бааһынай хаһаайыстыбаҕа баһылык сололооҕо – 429 дьахтар (21 бырыһыана)” диэн чахчыны холобурдаабыппын.
Билигин маннык чахчылары күнүстэри тымтыктанан даҕаны булбаккын. Эгэ, биирдиилээн кэтэх хаһаайыстыбалаахтары ким ситэн ааҕыай, аахсыай. Арай, саба быраҕан: “Аҕа баһылыктара, тойон эрдэрэ, уолаттара анал байыаннай дьайыыга бараннар, дьиэ-уот, хаһаайыстыба кыһалҕатын барытын сүүһүнэн дьиэ кэргэн далбар хотуттара нарын санныларыгар сүгэллэр”, – диэн моһуоннаахтык этэргэ тиийиллэр. Мунньах кыттыылаахтарын СӨ Ааҕар-суоттуур балаататын аудитора Татьяна Осипова эҕэрдэлииригэр кини тыа хаһаайыстыбатын миниистирин бастакы солбуйааччынан үлэлиир кэмигэр сыл аайы алтынньы 15 күнүгэр ылыллар Тыа сирин дьахталларын норуоттар икки ардыларынааҕы күннэрин олус тэрээһиннээхтик ылалларын уонна тыа сирин бастыҥ үлэһит дьахталларыгар анаан 3 кинигэни таһаарбыттарын өрө көтөҕүллүүлээхтик аҕынна.
Бу үөрүүлээх күҥҥэ элбэх киһи тыа хаһаайыстыбатыгар сыралаах үлэлэрэ бэлиэтэнэн, бырабыыталыстыба уонна биэдэмистибэ наҕараадаларын туттулар. Кинилэр истэриттэн Мэҥэ Хаҥалас улууһуттан “Павловскайдааҕы үүт астыыр собуот” ТХПК бэрэссэдээтэлэ Елена Оконешникова, Саха сирин мүөттээх ыҥырыаны иитээччилэрин кэпэрэтиибин бэрэссэдээтэлэ Күннэй Тимофеева, Куорунай улууһуттан “Чемезов Р.В.” бааһынай хаһаайыстыба чилиэнэ, агротуризмҥа үлэлэһэр Снежана Чемезова харда тыл эттилэр уонна биир идэлээхтэригэр үлэлэрин уопутуттан билиһиннэрдилэр.
Миниистири бастакы солбуйааччы түмүккэ министиэристибэ “Сайылык сылааһа” диэн анал байыаннай дьайыыга кытта сылдьар буойуттарга көмөҕө анаан тэрийбит аахсыйатыгар тыа хаһаайыстыбатын үлэһиттэрэ – ийэлэр, эбэлэр, эдьиийдэр, балтылар көхтөөхтүк кыттаннар, 200 ханыы сылаас наскыны баайан туттарбыттарын бэлиэтээн туран, истиҥник махтанна уонна баһыылканы “Саха сирэ эйигин кытта” уопсастыбаннай хамсааһын бэрэссэдээтэлэ Анна Ефимоваҕа туттарда. “Тыа сирин дьахталларын илиилэрин сылааһынан баайыллабыт наскылар уолаттарбытын кыһын уорааныттан харыстыахтара”, – диэтэ Анна Александровна.
Василий Никифоров
Хаартыскалары ТХАҮөБМ пресс-сулууспата биэрдэ.
День сельского хозяйства