Үүтү тутуу былаана туолара чугаһаата эрээри, хаһаайыстыбаларга “үүт харчытын” 77 бырыһыана тиксэрилиннэ
Өрөспүүбүлүкэ үрдүнэн үүтү тутуу былаана туолара чугаһаата. Ол курдук, бу дьыл сэтинньи 26 күнүгэр улуустартан түмүллүбүт сыыппараларга сигэннэххэ, 61 797 туонна үүт соҕотуопкаланан, 98,2 бырыһыана туолла. Быйылгы былаан – 62 902,01 туонна үүт. Былырыын баччаҕа 58 064 туонна ыаммытынан үүт соҕотуопкаламмыта.
Улуустар тыа хаһаайыстыбатын үлэтин өйүүр боломуочуйаларын толороллоругар аҥаардас үүтү тутууга өрөспүүбүлүкэ бүддьүөтүттэн 4 млрд 423 мөл. солкуобай кээмэйдээх субвенция көрүллүбүтэ. Бу үптэн 20 муниципальнай тэриллиигэ отчуоттанар кэмҥэ 3 млрд 433 мөлүйүөнэ, ол эбэтэр сыллааҕы үбүлээһинтэн 77 бырыһыана ыытыллыбыт. Оттон улуустар туппут үптэрин тыа хаһаайыстыбатын табаарын оҥорооччуларга барытын тиксэрбиттэрин иһитиннэрдилэр.
Ким төһө үүтү туппута сыыппара платформа нөҥүө көстө турар. Өрөспүүбүлүкэ 19 улууһугар уонна Дьокуускайга барыта 47 соҕотуопкалыыр тэрилтэ үүтү тутар. Хас даҕаны улуус былаанын аһарда: Нам 116,5, Мэҥэ Хаҥалас 114,6, Куорунай 104,4, Кэбээйи 103,7, Сунтаар 103, Чурапчы 101,7 бырыһыанныы толордулар.
Тыа хаһаайыстыбатын уонна ас-үөл бэлиитикэтин министиэристибэтин астыыр-үөллүүр бырамыысыланнаска салаатын салайааччытаЕгор Чичигинаров этэринэн, кэлэр нэдиэлэҕэ барыллаан ааҕыы түмүгүнэн үүт соҕотуопкатын былааныгар уларытыы киллэриллэрэ күүтүллэр.
Василий Никифоров
заготовка молока