Сүөһү-сылгы кыстыга билиҥҥитэ эриэ-дэхситик баран иһэр
Улуустартан отчуоттаабыттарын түмнэххэ, бу дьыл сэтинньи 27 күнүнээҕи туругунан, өрөспүүбүлүкэ бары киэптээх хаһаайыстыбаларыгар 178 013 ынах сүөһү уонна 216 841 сылгы бааллар. Ити иһиттэн 1 039 сыспай сиэллээх эбии аһатыыга турар.
Сунтаарга 207, Аммаҕа 206, Хаҥаласка 157, Дьокуускайга 97, Бүлүүгэ 83 сылгыны эбии аһаталлар. Оттон бырыһыанынан ыллахха, Эдьигээҥҥэ 9 сылгылаахтарын тохсуоннарын (100%) ынах сүөһүлүү көрөллөр.
Быйылгы кыстыкка хаһаайыстыбалар былырыыҥҥы быйаҥтан курулаабыт 16 906 туонна оттуун 430 345 дороххой аһылыктаах киирбит буоллахтарына, отчуоттанар кэмҥэ 367 916,10 туонна (85,49 бырыһыана) итиэннэ сүөһү сүмэһиннээх аһылыгар 30 718 туонна сиилэстэн, 14 783 туонна сенажтан туһааннааҕынан 28 184 уонна 11 885 туонналыы ордубуттар. Балары таһынан 71 280 туонна уотурба, 35 089 туонна эбиэс, 440 туонна туус хасааһа хаалбыттар.
Дьыл баччатыгар саамай кырыымчык аһылыктаах улуустар – Эбээн Бытантай 355 (48,76 бырыһыана), Булуҥ 27 (51 бырыһыана), Өлөөн 61,2 (64,15 бырыһыана) туонналыы оттоохтор. Дьокуускай уонна Алдан 75-тии, Мииринэй 74,26, Эдьигээн 77,42 бырыһыан отторо хаалбыт. Уоннааҕылар 80-тан 90-ҥа тиийэ бырыһыаннара баар. Сайыҥҥы халаантан иккитэ эмсэҕэлээбит Өймөкөөн улууһа 91,23 бырыһыаннаах. Үөһээ Дьааҥы 92,37, Үөһээ Бүлүү 94,33 бырыһыанныы хаһаастаахтар.
Василий Никифоров
Хаартыска: Альбина Винокурова, «Халыма долгуннара» хаһыат
Өссө ааҕыҥ: Үүтү тутуу былаана туолара чугаһаата эрээри, хаһаайыстыбаларга “үүт харчытын” 77 бырыһыана тиксэрилиннэ Тыа хаһаайыстыбата