«Сунтарцеолит» тэрилтэ алта үлэһитэ саҥа дьиэҕэ киирдилэр

Бүгүн Сунтаар нэһилиэгэр «Тыа хаһаайыстыбатын биир кэлимник сайыннарыы» диэн федеральнай тосхолунан тутуллубут  саҥа дьиэлэр күлүүстэрин 6 ыал үөрүүлээх быһыыга-майгыга туттулар, диэн «Сунтаар сонуннара» хаһыат суруйар.

Бу маннык сайдыыга, дьон уйгулаах олоҕун түстүүргэ туһуламмыт тосхолунан Сунтаар нэһилиэгэр үгүс үлэ ыытыллар.

Нэһилиэк дьаһалтата «Тыа хаһаайыстыбатын биир кэлимник сайыннарыы» диэн федеральнай бырагырааманан «Сунтарцеолит» ХЭТ кытта ыыппыт биир баараҕай бырайыактарын түмүктээтилэр. Ол курдук, «Сунтарцеолит” тэрилтэ бырайыак 30% үбүлээн бэйэтин үлэһит дьонун чааһынай, олорор дьиэнэн хааччыйда. Ону тэҥэ, тэрилтэ дьиэлэр тутууларын бэйэтэ ыытта.

Бырагыраама тыа хаһаайыстыбатын министиэристибэтин иһинэн үлэлиир. Онон саҥа дьиэ олохтоохторун тыа хаһаайыстыбатын министирин бастакы солбуйааччыта Анна Стручкова эҕэрдэлээтэ. Эдэр дьону тыа сиригэр олохсутарга, табыгастаах усулуобуйаны олохсутарга үлэлиир тосхол буоларын өссө төгүл бэлиэтээн эттэ. Ону тэҥэ, үөрүүлээх тэрээһиҥҥэ бырайыакка, дьиэ тутуутугар үлэлэспит дьону бэлиэтээтилэр, махтал тыллары анаатылар.

Максим Сыромятников «Сунтарцеолит» тэрилтэҕэ улахан уйуктаах тиэхиньикэҕэ суоппарынан үлэтин саҕалаабыта. Билигин кини карьер начальнигынан үлэлиир. Саҥа дьиэҕэ киириэхтэрин иннинэ элбэх оҕолоох эдэр ыал уопсай дьиэҕэ олорбуттара. Кэргэнэ Сардаана үгүс ыалдьыты көрсүү түбүгэр сылдьан:

«Киэҥ-куоҥ дьиэбитигэр сэтинньи ый саҕаланыыта көспүппүт. Дьиэбит иһэ-таһа барыта аныгы матырыйаалынан оҥоһуллубут. Олус сылаас оҕолор атах сыгынньах сүүрэкэлэһэллэр. Саҥа дьиэҕэ көспүппүтүттэн үөрүүбүт муҥура суох!». Аттыларыгар кэллиэгэлэрэ улахан уйуктаах тиэхиньикэ суоппара Артем Попов дьиэ кэргэнинэн эмиэ маннык тутуулаах дьиэ күлүүһүн тутта.

Эдэр ыалга тэрилтэтэ маннык көмөнү оҥорбута олохторун саҥа оҥостон эрэр дьоҥҥо улахан тирэх буоларын этэр.

Саҥа дьиэ эркинин «Сунтарцеолит» тэрилтэ бэйэтэ оҥорон таһаарар ыйааһына чэпчэки пеноцеолит диэн тутуу матырыйаалынан тутан таһаарда.

Дьиэ истиэнэтин халыҥа 50 см. буолан сылааһы тутар күүһэ улаханын бэлиэтээтилэр.

Хас биирдии дьиэ толору хааччыллыылаах, уотунан ититиллэр, сылаас муоста тэлгэммит. Тэрилтэ бэйэтэ эбии олохтоохтор баҕаларын учуоттаан дьиэ ис бараанын оҥорууга бырайыакка киирбэтэҕи эбии оҥорон биэрбит. Онон  дьиэ ис бараана аныгы көстүүлээх, барыта уурбут-туппут курдук оҥоһуулаах.

Петр Попов «Сунтарцеолит» ХЭТ генеральнай дириэктэрэ: «Бу туппут дьиэлэрбитин Сунтаар олохтоохторо олус сэргээтилэр. Онон маннык дьоҕус дьиэлэри тутарбытын тохтоппот, эбии сайыннарар санаалаахпыт. Кэлин ипотеканан атын да ньыманан үлэлиирбитин тобулабыт».

Оҕо саҥатынан туолбут алаһа дьиэлэр олохтоохторо саҥа сылы саҥа дьиэҕэ көрсөр үөрүүлэрэ үгүс.

Мира АФАНАСЬЕВА.

УлуусМедиа