«Чолбон өй күрэһэ. III улахан оонньуу» дуорааннаахтык саҕаланна!

Бу күннэргэ үгэскэ кубулуйбут «Чолбон өй күрэһэ. III улахан оонньуу» бастакы улуустааҕы түһүмэҕэ кэтэхтэн буола турар. Аан бастакынан сэтинньи 25 күнүгэр Хаҥалас улууһа сэттэ хамаанданы оонньотто. Онтон сэтинньи 26 күнүгэр горнайдар ыыттылар. Ахсынньы 1 күнүгэр Таатта, ахсынньы 2 күнүгэр Чурапчы, ахсынньы 4 күнүгэр Нам уонна Мэҥэ Хаҥалас хамаандалара күрэхтэстилэр. Билиҥҥи туругунан барыта 47 хамаанда кытынна. Ордук элбэх кыттааччыны – 12 хамаанданы Таатта улууһа туруоран үрдүк тыҥааһыннаах оонньууну ыытта.

Хаҥаласка Булгунньахтаах (38 балл), Горнайга Октябрскай (25 балл), Тааттаҕа Харбалаах «Сулус» (37 балл), Чурапчыга Чакыр «Үргэл» (33 балл), Намҥа I Хомустаах (34 балл), Мэҥэ Хаҥаласка Майа (35 балл) хамаандалара бастаатылар.

«Чолбон өй күрэһэ» кэлэр нэдиэлэҕэ Сунтаарга, Уус Алдаҥҥа уонна Дьокуускайга буолара торумнанар. Салгыы Аммаҕа, Ньурбаҕа, Үөһээ Бүлүүгэ, Бүлүүгэ уонна Дьокуускай куоракка литератураны таптааччылар оонньууллара күүтүллэр. Өрөспүүбүлүкэтээҕи финал уонна суперфинал эһиил тохсунньу ыйга ыытыллыахтара.

Санатар буоллахха, суперфиналга киирбит түөрт бастыҥ хамаанда «Саха» НКИХ быһа эфиригэр саха литературатыгар билиилэрин тургутуһуохтара.

«Чолбон» сурунаал бас эрэдээктэрэ Гаврил Андросов оонньуу туһунан санаатын үллэстэр:

– Быйылгы «Чолбон өй күрэһин» сурунаалбыт төрүттэммитэ 100 уонна бастакы эрэдээктэрбит Алампа Софронов төрөөбүтэ 140 сылларыгар анаатыбыт. Үһүс улахан оонньуу дьоһуннук саҕаланна. Былырыыҥҥыттан ыла бастакы түһүмэҕи интернет ситимин нөҥүө ыытабыт. Кыттааччыларбыт маннык тосхолго сүрдээҕин үөрэннилэр. Сорох улуустар кэтэхтэн ыытар ньыманы тутталлар. Биһиги бу бырайыакка Саха сирин киин уонна Бүлүү бөлөх улуустарын барытын хабарга дьулуһабыт. Бииргэ үлэлэһэр улуустар киин библиотекаларыгар махтанабыт!

Чопчулаан эттэххэ, «Чолбон өй күрэһэ. III улахан оонньууга» кыттыан баҕалаахтар үстүү киһилээх хамаанда туруоран улуус киин библиотекатыгар эбэтэр «Чолбон» сурунаал эрэдээксийэтигэр суруттарыаххытын уонна күрэс ирдэбилин билсиэххитин сөп. Бастакы түһүмэх кыайыылаахтара сыаналаах кинигэлэринэн, финалистар бириистэринэн бэлиэтэниэхтэрэ. Муҥутуур кыайыылаах хамаанда «Сахабэчээт» СӨ САТ сыаналаах бирииһи тутуоҕа.

«Чолбон өй күрэһэ. III улахан оонньуу» партнерунан СӨ Национальнай библиотеката, онтон сырдатыыга партнерунан «Саха» НКИХ, спонсорынан «Саха сирин суруйааччыта» ассоциация буолаллар.

Аах. Оонньоо. Кыай!

Алгыһы кытта «Чолбон» сурунаал

УлуусМедиа