Сурутуу – 2026: “Байанай” сурунаалы чэпчэкитик уонна судургутук суруттаран ааҕар түгэни мүччү тутумаҥ

Реклама: ГАУ РС(Я) «Сахапечать»

ИНН: 1435212010

Типография бэчээттиир уонна почта сурутууну тэрийэр, тиэрдэр өҥөлөрө сылтан сыл ыараан иһэллэриттэн сиэттэрэн, хаһыат-сурунаал сыаната үрдүү турар. Маннык кыһалҕаны намыратар туһуттан “Сахабэчээт” судаарыстыба автономнай тэрилтэтин салалтата бэйэтин таһаарыыларыгар, ол иһигэр “Байанай” сурунаалга, 2026 сылга альтернативалаах сурутууну тэрийэргэ быһаарда.

Ол курдук, сурутуу “альтернативнай” көрүҥэ Нам, Хаҥалас, Куорунай, Уус Алдан, Мэҥэ Хаҥалас, Амма, Чурапчы, Таатта, Бүлүү, Үөһээ Бүлүү, Ньурба, Сунтаар улуустарынааҕы хаһыаттар эрэдээксийэлэрин итиэннэ Дьокуускай куоракка “Сахабэчээт” САТ нөҥүө ыытыллар. Альтернативалаах сурутуулаахтар сурунаалларын олорор улуустарын эрэдээксийэтиттэн, оттон Дьокуускайга суруттарбыттар Бэчээт дьиэтиттэн бэйэлэрэ кэлэн эбэтэр киһинэн ыллараллар. Почта отделениета сабыллыбыт нэһилиэктэрдээх улуустарга улуус хаһыатын сурутууга маннык ньыманы туттубуттара ыраатта. Онон уопуттаахтар. Биирдиилээн сүүрэ сылдьыбакка, хаһыаты-сурунаалы тиэрдиини тустаах нэһилиэк дьаһалтатын нөҥүө хайа баҕарар тэрийиэххэ сөп.

Альтернативалаах сурутуу туох туһалааҕый? Бастатан, сурутааччыга (ааҕааччыга) иккиттэн биир табыгастааҕын, бэйэтигэр сөптөөҕүн талар кыах бэриллэр. Өскөтүн, почталаах сиргэ олорор уонна ол тэрилтэ эҥкилэ суох үлэлиир буоллаҕына, сыанатын кэрэйбэккэ, чуолаан, чэпчэтиилээх сурутуу кэмигэр түбэһиннэрэн, почта отделениетын нөҥүө суруттарбыт судургу. Ол гынан баран, улуус киинигэр, куоракка эбэтэр почтата суох бөһүөлэккэ (нэһилиэккэ), ону тэҥэ элбэх хаһыакка-сурунаалга сурутар ыалга сыанатынан даҕаны альтернативалаах сурутуу ордук барыстааҕа көстөн турар: “Байанай” сурунаалы почтаҕа сурутуу сыаната сыллааҕытыгар 2 800 уонна сыл аҥаарыгар 1 400 солкуобайтан тахсар эбит буоллаҕына, альтернативнайга – кэлтэгэй кэппиэйкэ чорбоҕо суох 2 000 уонна 1 000 солкуобайдыы.

“Байанай” сурунаал 3 ыйга, кыбаарталга, биирдэ, ол аата сылга түөртэ тахсар. Баҕар, сорохтор мыыныахтара эрээри, урукку курдук сахалыы-нууччалыы аҥаардаммакка, “Сахабэчээт” ылыаҕыттан 100 сирэй тухары толору төрөөбүт тылбытынан бэчээттэнэбит. Сурунаалбытын дьыл кэмин хаамыытыгар, чуолкайа, булт сезоннарыгар түбэһиннэрэн, сүрүн тиэмэлээн таһаарабыт: олунньутааҕы нүөмэргэ  – кыһыҥҥы түүлээх булда, ыам ыйынааҕыга – сааскы куска-хааска сааланыы, атырдьах ыйынааҕыга – туйахтаах кыыллары аттаах, ыттаах сылдьан сонордоһуу, сэтинньитээҕигэ – муҥха, муус аннынан балыктааһын, о.д.а. Ааспыттан санатыстахха, “Байанай” сурунаал эрэдээксийэтин туруорсуутунан Саха сиригэр Булчут күнэ бэлиэтэнэр буолбута. Аны сэрии уонна сут-кураан дьылларыгар саха норуотун хоргуйан өлүүттэн өрүһүйбүт балыкпытыгар махтанан, өрөспүүбүлүкэ таһымыгар Собо күнэ олохтонуохтааҕын, саха булчут лаайка ыта боруода быһыытынан бигэргэнэн Арассыыйаҕа билиниллиэхтээҕин утумнаахтык туруорсабыт.

Бултааһын-балыктааһын боппуруостарыгар элбэх уларытыы киирэринэн уонна дьоҥҥо сүбэ-соргу биэрэр сиэринэн “Булт быраабылата – сокуон”, уол оҕону эр киһилии иитиигэ аҕа оруолун чорботор уонна аан дойдутааҕы балаһыанньа сытыырхайбытынан төрөөбүт дойдуга тапталы иҥэрэр соруктаах “Эр хоһуун” рубрикалары наар үлэлэтэбит. Кэлиҥҥи сылларга бөһүөлэк чугаһынааҕы тыаҕа сир астыы тахсар даҕаны сэрэхтэммитинэн, эһэ-бөрө курдук сиэмэх кыыллар ахсааннарын сүрүннээһини дьыл кэмиттэн тутулуга суох харахпыт далыгар тута сылдьабыт. Булт мүччүргэннээх, байанайдаах сырыыларыттан саамай тыҥааһыннаахтарын талан таһаарабыт. Ол курдук, тыаҕа бултуу эбэтэр балыктыы сылдьан, тиэхиньикэлэрэ алдьанан, алдьархайга, ардыгар криминалга түбэһэн, түөрт дуу, икки дуу атахтаах адьырҕалартан, ахсынньытааҕы-тохсунньутааҕы тымныыга, муустаах ууга тоҥон өлүүттэн тыыннаах ордубут дьон сэһэргииллэрин ким баҕарар сэҥээрэн ааҕар. Уус-уран суруйуулары эмиэ төттөрү анньыбаппыт, “Айар кут” рубрикаҕа бииртэн-биир  кэрэхсэбиллээх кэпсээннэр тахсаллар. Үүнэр сыл нүөмэрдэригэр Александр Амбросьев-Сайылык Уолун “Аарыма” сэһэнин салгыытын, 3-с чааһын, таһаарарга былаанныыбыт. Дьэ, онон “Байанай” сурунаал урукку сылларга курдук булчут-балыксыт үүтээнигэр чуумпу-чуҥкук киэһэлэри сэргэхситэр сэһэннээх, санаа атастаһар арахсыспат аргыс, атас-доҕор буола туруохтун!

Сурутуу түмүгүнэн, үгэс курдук, почта нөҥүө уонна “Сахабэчээт” альтернативнайынан  суруттарбыт бэриниилээх ааҕааччыларбытыгар анаан, кими даҕаны араарбакка, туораппакка, сүүйүүлээх оонньуу тэрийэн ыытыахпыт. Сүрүн бириистэрбит: “Түүлээҕи тутар киин” ХЭУо-тан – аныгыскы 2026 – 2027 сыллардааҕы булт сезонугар туйахтаах кыылларга босхо лиссиэнсийэлэр, “Байанай-Центр” маҕаһыынтан – блогунан ботуруоннар, “Бадаар” маҕаһыынтан – тэрилтэ бэйэтэ оҥорор “БулТур” ПВХ тыыта (2 миэстэлээх, камуфляж), о.д.а. бултуурга-балыктыырга, сиргэ-уокка илдьэ сылдьан туттарга олус туһалаах тэриллэр оонньонуохтара.

Тыа сиригэр олорор дьон, улуускут хаһыатын эрэдээксийэтигэр сылдьан эбэтэр төлөпүөннэһэн, “Байанай” сурунаалга альтернативнай сурутууну туох-ханнык ньыманан тэрийэллэрин билсиҥ. Оттон киин куорат олохтоохторо, “Сахабэчээт” тэрилтэ үлэлиир хонтуоратыгар кэлэҕит эбэтэр кэпсэтэҕит (Дьокуускай к., Орджоникидзе уул. 31, Бэчээт дьиэтэ, 125-с хос, билсэр төл.: +7914 271 0705). Саҥа 2026 сыл буолара чугаһаата. “Байанай” сурунаал сурутуута – саҥа сылга эр дьоҥҥо дьоһуннаах бэлэх. Хас биирдии суруттарбыт киһиэхэ сурутууну бэлэхтиирин туоһулуур эҕэрдэ-аккырыыкканы туттарабыт. Кэргэҥҥитин – тойон эргитин,  аҕаҕытын, эһэҕитин, убайгытын, таайгытын Саҥа сылынан эҕэрдэлээн, бэлэм бэлэх туттарар кыах бэриллибитин мүччү туппаккытыгар баҕарабыт.

Василий Никифоров

УлуусМедиа