Мандардаах добун түһүлгэ
Бүгүн дэгиттэр талааннаах сүдү уус, ойууһут, бөлүһүөк, норуот маастара, Былатыан Ойуунускай аатынан Судаарыстыбаннай бириэмийэ лауреата, Саха Өрөспүүбүлүкэтин, Таатта улууһун, Баайаҕа нэһилиэгин Бочуоттаах олохтооҕо, саха норуотун саарына, тапталлаах чулуу уола Борис Федорович Неустроев — Мандар Уус 80 сааһын туолбут үбүлүөйдээх күнүн Улуу Туймаада хочотугар, өрөспүүбүлүкэбит килбэйэр киинигэр — Дьокуускайга бэлиэтээтилэр. Айхаллаах аатын ааттыыр, норуотун иннигэр үлүскэннээх үлэтигэр, үйэлээх үтүөтүгэр, килбиэннээх кэрэ бэйэтигэр сүгүрүйэр ытык күммүтүгэр тоҕус хайысхалаах добун түһүлгэ тэрилиннэ.
Бу күн Мандар Уус кэргэнинээн Федора Борисовналыын бар дьону көрүстүлэр, хардарыта алгыстарын анаатылар.
Мандар Ууһу СӨ Бырабыыталыстыбатын Бэрэссэдээтэлэ Кирилл Бычков, СӨ Бырабыыталыстыбатын Бэрэссэдээтэлин солбуйааччы Сергей Местников, СӨ культуратын уонна духуобунай сайдыытын министрэ Афанасий Ноев, СӨ Духуобунаһын Академиятын вице-президенэ Олег Сидоров о.д.а. уруйдуу кэллилэр. Таатта улууһун Аҕа баһылыга Айаал Бурцев, Баайаҕа нэһилиэгин баһылыга Александр Романов, уустар, айар уопсастыбаннас бэрэстэбиитэллэрэ эҕэрдэлээтилэр.
Үлэ кыбаарталын түөрт мэндиэмэнин тухары Мандар Ууска аналлаах хаартыскалар, кинигэлэр, уран тарбахтаах уустар быыстапкалара тардылынна. “Куйаары улаҕатынан, сири сиксигинэн” Мандар Уус бөлүһүөктүү ойууларын анаарыы, фотохудуоһунньук Иван Андросов түһэрбит хаартыскалара, “Түҥ былыргыттан аныгы кэмҥэ диэри” сахалыы таҥас дефилетэ, норуодунай суруйааччы Елена Слепцова-Куорсуннаах “Уус уонна итэҕэл” туһунан сэһэнэ дьон болҕомтотун тарта. “Саха көбүөрдэрэ” тэрилтэ салайааччыта Василий Бурцев “Мандар Уус айана” бырайыагынан 80 көбүөр атыытын Мандар Уус этнокомплексыгар Мас ураһа тутуутугар аныыр санаалаах.
“Айанньыт” Ил Дархан сүбэһитэ Георгий Никонов дьиҥнээх олохтон устубут киинэтэ көрдөрүлүннэ. Бу киинэ өссө ахсынньы 11 күнүгэр 16.20 чааска “Лена” киинэ театрыгар көрдөрүллүөҕэ.
Мандар Уус 80 сааһыгар “Молодая гвардия” кыһа “Жизнь замечательных людей” сиэрийэтин иһинэн СӨ Духуобунаһын вице-президенэ Олег Сидоров суруйбут кинигэтэ тахсыаҕа. Инникитин Иван Андросов хаартыскаларын альбома бэчээттэнэрэ, суруйааччы Гаврил Андросов суруйуутунан П.А. Ойуунускай аатынан Саха академическай театрын сценатыгар туруоруллара, аны сайын Тааттаҕа Уустар Ыһыахтара ыытыллара былааннанар.
Валентина Бочонина
Валентина Догоюсова уонна ааптар хаартыскаҕа түһэриилэрэ
Өссө ааҕыҥ: Норуот маастардарын уран оҥоһуктара Мандар Уус түһүлгэтигэр тэлгэннэ Мандар Уус