Егор Ларионов биһигин ыйаабыт сиригэр ыалдьыттаата
Госсулууспа бэтэрээнэ Егор Ларионов санныгар 85-с хаарын түһэрдэ. Төрөөбүт дойду бэйэтигэр тардар, угуйар сиэринэн Егор Михайлович киинэ түспүт, биһигин ыйаабыт дойдутугар Салбаҥҥа ыалдьыттаата, диэн «Эҥсиэли» хаһыат суруйар.
Урут бастаан оскуола оҕолорун кытта көрүстэ. Төрөөбүт дойд у, ийэ, аҕа, дойду дьоно ураты кэрэ буолалларын уонна үөрэх суолтатын туһунан эттэ.
Оҕолор Егор Михайловиһы олус кэтэспиттэрэ, кини араатарын, сээркээн сэһэнньитин дьоннорун кэпсээннэриттэн билэллэрэ, онон маннык сэдэх түгэн тосхойон, кини тылын-өһүн истэн, толкуйун-санаатын көрөн астыннылар.
Салгыы Кыайыы скверигэр быйыл турбут «Ааллаах Үүн таһаҕасчыттара» стелаҕа сибэкки дьөрбөтүн уурда.
Аҕата Михаил Яковлевич Ларионов-Лаҥха ат көлөнөн таһаҕас таһарын, ол иһин өр кэмҥэ суох буоларын, аны салгыы Японияны утары сэриигэ сылдьан, этэҥҥэ тыыннаах эргиллэн кэлбитигэр «аҕалаах үчүгэйин билбитим» диэн аҕынна.
«Эйгэ» норуот айымньытын киинигэр Егор Михайлович 85 сааһын бэлиэтиир үөрүүлээх чааһа буолла.11-с кылаас үөрэнээччитэ Настя Винокурова Егор Михайлович төрөөбүт алааһын Балаҕаннааҕы уруһуйдаабытын дохсун ытыс тыаһыгар доҕуһуоллатан туттарда.
Түмүккэ Егор Михайлович, Аан дойдуга политическай күөнтэһии кытаанаҕын, онно хайдах-туох дьаһанан олоруллары, илдьэ кэлбит төрүт дьарыкпытын — сылгыны, ынаҕы эспэти, төрүт майгыбытын — сиэрдээх быһыыны умнубаты, түмүстэххэ, сомоҕолостоххо ханнык баҕарар кыһалҕа, сорук кыайылларын ыйда.
Бырааһынньыктыы киэргэммит саалаҕа Салбаҥ далбардара юбиляр төрөөбүт Балаҕаннааҕа сибэккинэн симэммит, хатыҥынан тулаламмыт тордун киллэрдилэр.
Егор Михайлович дьоһуннааҕы санаан, торду бастакынан быһан дьонун күндүлээтэ. Киэн туттар, холобур оҥостор киһибитин, Егор Михайловиһы, дойдутун дьоно бу курдук көрүстүбүт, үтүөнү баҕаран алгыс тылбытын эттибит.
Татьяна Касьянова
юбилей