Чыамайыкы нэһилиэгэр толору хааччыллыылаах дьоҕус пиэрмэ арылынна
Ахсынньы 13 күнүгэр Мэҥэ Хаҥалас Чыамайыкы нэһилиэгин үлэни өрө тутар эдэр кэскиллээх ыччата Сахаян Иванович Куприянов хороҕор муостааҕы хойуннарар, үрүҥ илгэни үлүннэрэр саҥалыы туспаҕай тутуулаах, толору хааччыллыылаах 40 хороҕор муостаах турар дьоҕус пиэрмэтэ арылынна. Бу туһунан «Эркээйи» хаһыат суруйар.
Аныгы ирдэбилгэ толору эппиэттиир мэхэньисээссийэлээх хотон тутуутугар уонна үүт туттарыы хайысхатынан үлэлииргэ айширскай боруодалаах 10 ынаҕы атыылаһарга эдэр пиэрмэр улууска биллэриллибит үс сыллаах тыа хаһаайыстыбатын сылларыгар олохтоммут 6 мөлүйүөн солк. граны кыайан, эбии үп-харчы эбэн, итиэннэ нэһилиэк дьаһалтатын көмөлөһөн 9 мөлүйүөн солк. тыа хаһаайыстыбатын сайыннарар саҥа эбийиэк үлэтин саҕалаата.
Саҥа тутуу сылаас, ыраас, үйэлээх буоларыгар саха омук сиэринэн нэһилиэк ытык киһитэ Егор Семенов алгыс сиэрин-туомун толордо.
Үөрүүлээх быһыыга-майгыга улуус баһылыга Дмитрий Тихонов, СӨ Судаарыстыбанньай мунньаҕын Сир сыһыаннаһыыларыгар, айылҕа баайыгар-дуолугар, экологияҕа сис кэмитиэтин бэрэссэдээтэлэ Андрей Находкин, нэһилиэк баһылыга Александр Захаров, «Агроэксперт» тэрилтэ исписэлииһэ Николай Постников эҕэрдэ тылларын кытта дьоҕус пиэрмэ салайааччытыгар Сахаян Ивановичка хаһаайыстыбата үүнэригэр-сайдарыгар баҕа санааларын эттилэр.
Ыанньык хотону арыйар лиэнтэни кырыйыы үөрүүлээх түгэнин кэннэ сүөһү-ас үксүү турарыгар кэлии боруода саамай үүттээх Марфуша диэн ынах дохсун ытыс тыаһынан киирэн миэстэтин булла.
Сахаян Куприянов: “Билиҥҥи туругунан хаһаайыстыбаҕа 19 ынах сүөһү баар – 10 айширскай боруодалаах уонна ийэм биэрбит 3 ынаҕа, 6 онтон кыра сүөһүлэр. Былаанынан биир боруода ынахтан сылга 4‒5 туонна үүт ыаныаттаах. Салгыы 5 сыл 10 үүт боруодатын тэнитэн 40 ыанар ынахха тиэрдиэхтээхпин.
Нэһилиэккэ быраатым Арылхан Босиковтыын сылы толору үлэлиир үүт араас бородууксуйатын атыыга оҥорон таһаарар сыаҕы тутар сыаллаахпыт. Хотону тутууга акылаатыгар 40-тан тахса массыына буор кутулунна, муостата бетонунан, көҥдөйө тимир каркаһынан, сэндвич-панель матырыйаалынан тутулунна. Билигин электроуот, автопоилка, ититии ситимэ киирдэ, салгыы ТСН холбоноро хаалла.
Тыа хаһаайыстыбатын салаатын талан дойдубар Чыамайыкыга үлэлиирбэр кэргэним өйөбүлүгэр махтанабын. Пиэрмэни тутарга илии күүһүнэн, тиэхиньикэнэн, сүбэнэн-аманан көмө буолбут аймахтарбар, доҕотторбор, олохтоохторго, бааһынай хаһаайыстыба салайааччыларыгар, оскуола, олох-дьаһах, хомунаалынай хаһаайыстыба, нэһилиэк уонна улуус дьаһалтатын кэлэктиибигэр маны тэҥэ Ленинградскай уобаластан 10 айрширскай боруодалаах ынаҕы аҕаларга, миигин кытары ыкса үлэлэһэр «Агроэксперт» тэрилтэҕэ уонна көмөлөспүт улуустааҕы тыа хаһаайыстыбатын управлениетын начаалынньыгар Аркадий Лукинҥа, бырайыагым бастакы хардыыларыттан, араас түһүмэхтэри, ыарахаттары туораан олоххо киирэригэр бииргэ үлэлэспит нэһилиэк баһылыгар Александр Захаровка, хаһаайыстыбаҕа бастакынан үлэһитинэн киирбит доҕорбор-атаспар Иван Васильевка улахан махталбын тиэрдэбин. Өссө даҕаны инникитин бары биир сомоҕо күүһүнэн тыа хаһаайыстыбатын сайыннарыаҕыҥ диэн ыҥырабын”, – диэтэ.
Иван Лукин
Сельское хозяйство