Кыстыкка аһылык дэлэй эрээри, ынах сүөһү ахсаана сабаҕаламмыт таһымтан аҕыйаата
Ахсынньы аам-даам тымныынан аргыйан, бэлиэр аҥаардаста. Бу кэмҥэ өрөспүүбүлүкэ бары киэптээх хаһаайыстыбаларыгар 153 305 ынах сүөһү уонна 189 814 сылгы кыстаан тураллар.
Сүөһү бүттүүн ахсаана ааспыт сыл туһааннаах кэмигэр отчуоттаммыты кытта тэҥ эрээри, лоп курдук биир нэдиэлэ анараа өттүгэр баартан 5 тыһ. төбөнөн аҕыйаабыт итиэннэ ол иһигэр ынах ахсаана (билигин хотоҥҥо турарынан 64 494 төбө) 0,9 бырыһыанынан итэҕэс. Тыа хаһаайыстыбатын уонна ас-үөл бэлиитикэтин министиэристибэтэ улуустар бэйэлэрэ сабаҕалаабыт сыыппараларыгар олоҕуран оҥорбут былаанынан саҥа 2026 сылга өрөспүүбүлүкэбит 154 395 ынах сүөһүлээх, ол иһиттэн 65 934 ынахтаах үктэниэхтээҕэ, көстөрүн курдук, туолбата билиннэ.
Сылгы бүттүүн ахсаана нэдиэлэ анараа өттүгэр 193 427 төбө баар эбит буоллаҕына, отчуоттанар кэмҥэ 3 613 төбөнөн аҕыйаабыт. Былырыын баччаҕа отчуоттаммыттан 0,4 бырыһыанынан итэҕэс. Ол иһигэр биэ ахсаана 4,9 бырыһыанынан аҕыйаан, билигин 115 029 биэ кыстаан турар. Быйыл барыта 173 109 сылгы кыстатыллара былааннанар, ол эбэтэр өссө даҕаны 16 тыһыынча кэриҥэ сылгы эккэ туттуллара хаалла.
Биир нэдиэлэ анараа өттүгэр 3 577 төбө сыспай сиэллээх эбии аһатыыга киирбит эбит буоллаҕына, билигин – 4 201. Бу сылгы бүттүүн ахсаанын 2,2 бырыһыаныгар тэҥ. Чуолаан, элбэх сылгыны Мэҥэ Хаҥаласка (1 259 төбө), Куорунайга (1 096), Хаҥаласка (832), Үөһээ Бүлүүгэ (412) уонна Кэбээйигэ (406) эбии аһаталлар. Халыҥ хаардаах хотугу улуустартан Орто Халымаҕа 2 602 сылгыттан 57-ни туруорбуттар.
Быйылгы кыстыкка хаһаайыстыбалар былырыыҥҥы быйаҥтан курулаабыт 16 906 туонна оттуун 430 345 дороххой аһылыктаах киирбит буоллахтарына, отчуоттанар кэмҥэ 342,6 тыһ. туонна от (79,6 бырыһыана) итиэннэ сүөһү сүмэһиннээх аһылыгар 30 718 туонна сиилэстэн, 14 783 туонна сенажтан туһааннааҕынан 25 тыһ. (81,7 бырыһыана) уонна 11,7 тыһ. (79,6 бырыһыана) туонналыы ордубуттар. Онон аһылык хасааһынан сирдэттэххэ, сүөһү-сылгы кыстыга этэҥҥэ баран иһэр.
Василий Никифоров
Хаартыска: Алена Докторова (Улус.Медиа архыыбыттан)
Сельское хозяйство