«Чолбон» сурунаал эдэр ааптардара үлэлэрин билиһиннэрдилэр
Ахсынньы 18 күнүгэр П.А. Ойуунускай аатынан литература музейыгар «Чолбон» сурунаал эдэр ааптардара – суруйааччылар, поэттар кыттыылаах төгүрүк остуол буолла.
Ол курдук драматург Утум Захаров, прозаиктар Валерий Андросов, Федор Павлов, Сардаана Корякина, оҕо суруйааччылара Мария Винокурова, Анна Колосова, поэт Гавриил Адамов уонна тылбаасчыттар Лилия Иванова, Анастасия Еремеева айар үлэлэрин туһунан кэпсээтилэр, инники былааннарын билиһиннэрдилэр. Тэрээһиҥҥэ кыттыбыт «Саха сирин суруйааччыта» ассоциация бэрэссэдээтэлэ, «Илин» сурунаал бас эрэдээктэрэ Олег Сидоров, литература музейын дириэктэрэ Рустам Каженкин эдэр дьоҥҥо сүбэ-саргы тылларын эттилэр, сонун санааларын үллэһиннилэр.
«Чолбон» сурунаал бас эрэдээктэрэ Гаврил Андросов:
«Айар дьоҥҥо маннык көрсүһүүлэр олус туһалаахтар. Кинилэр, биир өттүнэн, бэйэ-бэйэлэрин кытта билсэллэр, алтыһаллар, иккиһинэн, туох эмэ бырайыак, айар-тутар сонун санаа үөскүөн сөп. Бу көрсүһүү саха уус-уран литературатын төрүттэспит дьонтон биирдэстэрэ, классик суруйааччылартан саамай эдэрдэрэ Николай Неустроев төрөөбүт күнүн бэлиэтиир кэмҥэ буолбута эмиэ олус суолталаах дии саныыбын».
ЛитератураЧолбон