Кырачааннар Тоокулуун Саҥа дьылы көрүстүлэр
Горнай улууһун Бэрдьигэстээх сэлиэнньэтин «Кэнчээри» оҕо уһуйааныгар «Күн мичээрдэрэ» кыра бөлөх төрөппүттэрэ күүтүүлээх Саҥа дьылы көрсө сэргэх киэргэтиини оҥордулар.
Ол курдук, «Тоокулуун Саҥа дьылы көрсөбүт» бырааһынньыкка анаан «Тооку» ойуулуктан сүрүн геройдарын фанераттан быстаран, дьэрэкээн өҥнөрүнэн уруһуйдатан оҕолору үөртүлэр.
Ону кытта таҥастан куукулалары оҥорон аҕаланнар бөлөх киэргэтиитин өссө ситэрэн биэрдилэр.
Моруунньаны Алина Софронеева, Мичийэни Анастасия Заровняева, Тоокуну Айыына Яковлева уонну Чууну Ирина Дьячковская тикпиттэр.
Ойуулук аптаах геройдарын кытта оҕолор үөрэ-астына оонньоотулар, ырыа ыллаатылар, үҥкүүлээтилэр, харыйа тула эргийдилэр.
Хас биирдии оҕо Моруос оҕонньортон минньигэс бэлэхтэри тутан үөрүүтэ үксээтэ.
Саҥа дьылы көрсө араас уран көстүү киһи эрэ сүргэтин көтөҕүөх, дууһатын манньытыах алыптаах эйгэҕэ киллэрэр.