Горнай улууһугар Петровтар дьиэ кэргэн араас көтөрү иитэллэр
Октябрьскай нэһилиэгин сис ыаллара Гаврил, Зинаида Петровтар олохтоох бэйэ аһа дэлэйэригэр төһүү үлэни ыыталлар. Бу туһунан «Үлэ күүһэ» хаһыат кэпсиир.
Ол курдук, холобур ааспыт сылга түргэнник ситэр салаа көтөрдөрүттэн, индюктан, кус, куурусса чоппууска арааһыттан барыта холбоон, 900-ҕэ тиийэ чоппууска таһаарбыттар. Ону тыа сирин дьонугар түҥэппиттэр.
Быйыл Хайсекс Браун боруода кууруссаларыттан номнуо 350 сымыыттан 205 чоппууска таһааран олороллор, олортон 110 чоппууска нэһилиэнньэҕэ, улууска түҥэтиллибит.
Сааскы ыйдарга индюк, сайын бройлер сымыытын таһаарар былааннаахтар. Петровтар куурусса иитиитинэн 38 сылын дьарыгыраллар, онон уопуттаах үлэһиттэр.
Кууруссаны дэлэтэн иитээччилэргэ кэккэ сүбэлэрин маннык этэллэр:
Куурусса сымыыта анал инкубаторга 37.8 кыраадыска 21 хонугунан тахсар.
Чоппуускалар тахсалларын саҕана температураны намтатан, салгын сиигин үрдэтэн бэриллиэхтээх.
Саҥа тахсыбыт чоппуускалары сылаас сиргэ тутуллуохтаах, сөптөөх аһынан аһатыллыахтаах. Билигин атыыга көтөр арааһыттан, чоппууска хонугуттан көрөн, комбикорм атыыга дэлэй.
Бэйэ кууруссатыттан тахсыбыт чоппуускалары сатаан аһатан, көрөн-истэн ииттэххэ, күһүн, кыһын сиир аскын хааччынынарыҥ таһынан, дьиэ кэргэҥҥитигэр эбии дохуот оҥостуоххутун сөп.
Онон эдэр ыаллар бу хайысханан дьарыктанаргытыгар сүбэлиибит. Онно биллэн туран, улуус, өрөспүүбүлүкэ бэйэ дьарыктаах буолуутун өйүүр бырагыраамалара субсидиялара төһүү көмө буолаллар. Ону сөптөөхтүк туһанан, дьиэ кэргэҥҥит дьарыктаах буоларыгар ыҥырабыт.
Нина Сутакова
Тыа хаһаайыстыбата