Одунуга балыыһа хочуолунайа хаһан үлэҕэ киирэрин бырабыыталыстыба отчуотугар ыйыталастылар
СӨ Үөрэххэ уонна наукаҕа миниистирин I солбуйааччыта Ньургун Павлов салайааччылаах бөлөх бырабыыталыстыба отчуотун Одунуга ыытта. Бу туһунан «Үлэ күүһэ» хаһыат суруйар.
Отчуот ыытыллыан иннинэ «Туллукчаана» оҕо сайдар киинигэр, баһаарынай чааска, хочуолунайга сылдьан, үлэни-хамнаһы миэстэтигэр тиийэн көрдүлэр.
Ньургун Михайлович 2025 с. бырабыыталыстыба ыыппыт үлэтин-хамнаһын экрааҥҥа көрдөрөн, нэһилиэнньэҕэ сиһилии сырдатта. Одунуга отчуокка үгүс киһи кыттан, долгутар боппуруостарын биэрдилэр, этиилэрин киллэрдилэр. Дьон-сэргэ ааспыт сылга Бырабыталыыстыга отчуотугар протоколга боппуруостан төһө олоххо киирбитин интэриэһиргээн ыйыттылар.
Мунньахха нэһилиэнньэ сүрүннээн балыыһа хочуолунайа хаһан тутуллан, киирэрин ыйыталастылар. Билиҥҥи туругунан, тутуу материала кэлэн, турар эбит. Нэһилиэнньэ быйыл хайаан да ититии ситимэ киирэригэр күүскэ туруорсар. Эбэтэр саҥа хочуолунай тутуллубат түгэнигэр гаастааһын боппуруоһун көрөллөрүгэр эттилэр.
Ону тэҥэ тыа хаһаайыстыбатын тула ыйытыыларга тохтоотулар. Өр кэмҥэ тыа хаһаайыстыбытынан утумнаахтык дьарыктаммыт Анастасия Ефремова саҥа типовой хотон тутуутун боппуруоһун көтөхтө. 50-ча сыл тыа хаһаайыстыбатыгар эҥкилэ суох үлэлээн кэлбит Павел Корякин «Саха сүөһүтэ» генопуонда хааһына тэрилтэ «Кылыс» отделениетыгар Горнай улууһун баһылыгынан, улуус Мунньаҕын бэрэссэдээтэлинэн үрдүк таһаарыылаахтык үлэлээбит Петр Иннокентьевич Васильев аатын аныылларыгар эттэ.
«Туллукчаана» оҕо сайдар киинигэр хапытаалынай өрөмүөн ыытылларыгар эттилэр. Саҥа элбэх хайысхалаах спортивнай комплекс тутуутун боппуруоһун көтөхтүлэр. СВО кыттыылааҕын дьиэ кэргэттэрэ буолалларын туоһулуур дастабырыанньа наадалааҕын эттилэр.
Ону тэҥэ 2026 с. Горнай улууһугар туох тутуу үлэтэ ыытыллыахтааҕын, «Микрополис» бырайыагын, сыана үрдээһинин, оҕо пособиетын, соцконтракт боппуруостарын о.д.а чуолкайдаан ыйыттылар.
Дьон-сэргэ олорор усулуобуйата тубустаҕына, Одунуга үгүс эдэр ыччат өссө сөбүлээн олохсуйуо этэ диэтилэр.
Түмүккэ улуус баһылыга Никита Андреев отчуокка кыттыбыт дьоҥҥо махтанна.
отчет правительства