Булчуттар болҕомтолоругар: бөрө тириитин тутуу кулун тутар 16 күнүттэн саҕаланыа
Экология, айылҕаны туһаныы уонна ойуур хаһаайыстыбатын министиэристибэтин бу дьыл кулун тутар 12 күнүнээҕи бирикээһигэр олоҕуран, өрөспүүбүлүкэ судаарыстыбаннай бүддьүөтүттэн бөрө уонна бөрө оҕотун тириилэрин тэрээһиннээхтик атыылаһыы ороскуотун үбүнэн хааччыйыыга көрүллүбүт 13 мөл. солкуобай кээмэйдээх субсидия “Түүлээҕи тутар киин” ХЭУо-ҕа бэриллэрэ быһаарылынна.
Санаттахха, Егор Андросов салайааччылаах тэрилтэ былырыын эмиэ куонкуруска кыайан, 2,5 мөлүйүөҥҥэ 85 бөрө тириитин тутууну тэрийбитэ. Онно холоотоххо, үп-харчы кырыымчыгын үрдүнэн быйыл үгүөрүтүк көрүллэн, быһа барыллаан, 400-тэн тахса адьырҕа тириитэ соҕотуопкаланар кыаҕа үөскээтэ. Онон кэм даҕаны элбэх бөрөһүт-булчут эрэйин боруостатара эрэбил.
Саха сирин тыатын хаһаайыстыбатыгар сыл ахсын ортотунан 200-чэ мөлүйүөн солкуобай хоромньуну таһаарар адьырҕа кыыл ахсаана кэлиҥҥи сылларга 7,5 тыһыынчаттан көҕүрүү илик. Бөрөнү бултааһын көрдөрүүтүн сылларынан тэҥнээтэххэ, улаханнык арыттаһар. Ол курдук, кэлиҥҥи 10 сылга бөрө муҥутуурдук бултаммыт кэмэ: 2017 с. – 830, 2016 с. – 814, 2014 с. – 778. Онтон 2020 сылтан саҕалаан намыраан, 440-ҥа (2023 с.), 448-ка (2024 с.) түстэ. Булт салаатыгар сыһыаннаах салайааччылар маннык көстүү үбүлээһинтэн төрүөттээҕин ыйаллара оруннаах. Арай, быйыл 2024 сыллааҕыны (10 мөл. солкуобай этэ) даҕаны сабырыйда эрээри, биир тирии иһин төлөбүр кээмэйэ оннунан хаалларылынна: улахан бөрө 30 тыһыынча, оҕотун дууһата 10 тыһыынча солкуобай сыаналаахтар.
Бөрөһүттэр былырыын харчы кырыымчыгынан элбэх тириини ситэ туттарбатахтарын ааҕыстахха, быйыл даҕаны “бөрө харчыта” түргэнник бүтүөҕэ сэрэйиллэр. “Түүлээҕи тутар киин” ХЭУо бөрө тириитин тутууну аныгыскы нэдиэлэттэн, кулун тутар 16 күнүттэн, саҕалыырын биллэрэр. Аадырыһа: Дьокуускай, Жорницкай уул. 12-с дьиэтэ. Билсэр, ыйыталаһар төл.: 8-961-869-83-13 уонна 8-964-420-61-08.
Василий Никифоров
Хаартыскалар: “Түүлээҕи тутар киин” ХЭУо архыыбыттан
Тыа хаһаайыстыбата