Сүөһү кыстыга: сорохтор отторун курулатыахтара, төрүөҕү ылыы былырыыҥҥыттан тэтимнээх
Кыстык түмүктэнэрэ 75 хонук хаалла. Ол аата сүөһү-сылгы кыһыҥҥы ыйдары туоруохтаах аһылыгыттан бу кэмҥэ үстэн биирэ баар буолуохтаах. Тыа хаһаайыстыбатын уонна ас-үөл бэлиитикэтин министиэристибэтин дааннайынан, 2025 — 2026 сыллардааҕы кыстыкка 413 438 туонна от, 30 718 туонна сиилэс, 14 783 туонна сенаж бэлэмнэниллибититтэн 188,4 тыһ. туонна от (43,8%), 13,2 тыһ. туонна сиилэс (43,1%), 4,9 тыһ. туонна сенаж (33%) ордубуттар.
Онон сүөһү-сылгы кыстыга биир кэм туруктаахтык баран иһэр диэн исписэлиистэр сыаналыыллар. Улуустар уонна куораттардааҕы уокуруктар хомуйбут сыыппараларыгар сигэннэххэ, бу дьыл кулун тутар 12 туругунан, өрөспүүбүлүкэ бары киэптээх хаһаайыстыбаларыгар 153 907 ынах сүөһү (ааспыт сыл туһааннаах кэмин кытта тэҥнээтэххэ, 4,9% аҕыйах), ол иһигэр 63 288 ынах (былырыыҥҥыттан 3,9% аҕыйах) кыстаан турар.
Отчуоттанар кэмҥэ 10 232 ынах төрөөтө, ол эбэтэр былырыыҥҥы туһааннаах кэмтэн 5,1 бырыһыанынан элбэх. Быйыл төрүөх биэриэхтээх ынахтан 16,2 бырыһыана (ааспыт сыл баччаҕа 14,8 бырыһыаҥҥа тэҥнэһэрэ) ньирэйдэннэ. Лоп курдук нэдиэлэ анараа өттүнээҕи отчуоттан көстөрүнэн, 8 080 ынах төрөөбүт этэ (туһааннаах кэмтэн 11,7 бырыһыанынан аҕыйах), ол эбэтэр ынах бүттүүн ахсааныттан 12,7 бырыһыана (былырыыҥҥы 13,8 бырыһыан оннугар). Онон төрүөҕү ылыы өрө баран, тэтимин ылан эрэрэ үөрдэр.
Василий Никифоров
Тыа хаһаайыстыбата