Дьокуускайга Хаҥалас күннэрэ түмүктэннилэр
Дьокуускайга П.А. Ойуунускай аатынан Саха государственнай тыйаатырыгар Хаҥалас улууһун күннэрин түмүктүүр тэрээһиннэр буоллулар. Бу туһунан «Хаҥалас» хаһыат суруйар.
Манна айар-тутар дьоммут, ону сэргэ туризм эйгэтигэр үлэни сырдатар быыстапкалар турдулар, улууска оҥоһуллан тахсар ас-үөл бородууксуйатын атыыта-эргиэнэ дэлэйдэ. Алампа саалатыгар быйыл үбүлүөйдэрин бэлиэтиир Сиинэ, Төхтүр оскуолалара выпускниктарын, араас кэмҥэ үлэлээбит учууталларын түмэн, төгүрүк сылларын көрсө үлэни торумнаатылар.
Киэһээ айар талааннаахтар кыттыылаах улахан кэнсиэр буолла. Хаҥалас күннэрэ ситиһиилээхтик ааспыттарынан түмүктүүр тыллары СӨ Ил Түмэнин бэрэссэдээтэлин бастакы солб. Афанасий Владимиров, култуураҕа уонна духуобунай сайдыыга миниистир Афанасий Ноев эттилэр.
Бары кыттыбыт дьоҥҥо махталын тириэрдэн улууспут баһылыга Сергей Гребнев Хаҥаласпыт, дойдубут сайдыытыгар сомоҕолоһон бииргэ буолуоҕуҥ диэн ыҥырда. Кэнсиэртэн киирбит үп Анал байыаннай дьайыыга кытта сылдьар биир дойдулаахтарбытыгар ананна.
Людмила Аммосова, ааптар хаартыскаҕа түһэриитэ
Год единства народовХангаласский район