Покровскайга литература кулууптара уонна айар түмсүүлэрэ көрсүөхтэрэ
Кулун тутар 25 күнүгэр «Чолбон» уус-уран литература уонна общество-политика сурунаала төрүттэммитэ 100 сылын көрсө Хаҥалас улууһун Покровскай куоратыгар II Өрөспүүбүлүкэтээҕи литература кулууптарын уонна айар түмсүүлэрин форума буолаары турар. Манна Дьокуускай куораттан, Алдан, Ньурба, Томпо, Таатта, Нам улуустарыттан литература кулууптара кыттыахтара.
Бу күн «Дорҕоонноохтук!» көҥүл ааҕыы түһүлгэтэ (бэйэ айымньытыттан быһа тардыы) үлэлиэҕэ, «Сулустаах» хоско суруйааччыны кытта тус көрсүһүүлэр, литература кулууптарын уонна айар холбоһуктарын салайааччыларыгар төгүрүк остуол уонна «Уус-уран тыл. Проза», «Уус-уран тыл. Поэзия», «Саха аныгы литературатыгар ааҕааччы рецензията», «Киинэ уонна сериал сценарийын маастарыстыбата» секцияларынан үлэ буолуохтара.
Форум кэмигэр прозаҕа уонна саха аныгы литературатыгар ааҕааччы рецензиятыгар эрдэ биллэриллибит күрэс түмүгэ тахсыаҕа. Манна Дьокуускай куораттан, Ньурба, Хаҥалас, Томпо, Кэбээйи, Үөһээ Дьааҥы, Таатта, Өлүөхүмэ, Алдан, Бүлүү улуустарыттан 48 үлэ киирдэ.
Тэрээһиҥҥэ суруйааччылар Анна Варламова-Айысхаана, Данил Макеев, Афанасий Гуринов, Анатолий Слепцов, поэттар Гаврил Андросов, Ангелина Шадринова-Суоһааны, Рустам Каженкин, драматурдар Семен Ермолаев-Сиэн Өкөр, Утум Захаров, режиссер Эдуард Новиков, сценарист Октябрина Шестакова уо.д.а. кыттыахтара.
«Чолбон» сурунаал
Год культуры в ЯкутииЛитератураЧолбон