«Депутат быһыытынан үлэтин сыаналаатахха…» — улуус олохтооҕун санаата
Үөһээ Бүлүү улууһун бочуоттаах олохтооҕо, СӨ норуотун хаһаайыстыбатын Үтүөлээх үлэһитэ, «Гражданскай килбиэн» бэлиэ хаһаайына Иван Егорович Чычахов Владимир Поскачин депутаттыыр үлэтин туһунан санаатын аһаҕастык үллэһиннэ:
«Владимир Поскачин Ил Түмэн СӨ Судаарыстыбаннай Мунньаҕын 7-с ыҥырыытын депутатынан биһиги улууспуттан уонна Горнайтан талыллыбыта. Ол эрээри, 2023 сылтан ыла кини депутат быһыытынан талбыт улуустарын интэриэһин көмүскээбитин да, ханнык эмэ таһымҥа үлэлэспитин да көрбөтүбүт. Биирдэ даҕаны быыбардааччыларын кытта көрсөн аһаҕас кэпсэтиини, улууспут сайдыытыгар туһаайыллыбыт үлэни ыыппата.
Интернет ситимин нөҥүө тыа сирэ эстиитин туһунан элбэҕи этэр, суруйар да буоллар, кырдьыгынан эттэххэ, тыа сирин сайдыытыгар туһуламмыт сокуоннары оҥорууга кини кыттыыны ылбата. Ону таһынан, кини үлэлээбит кэмнэригэр Үөһээ Бүлүү улууһугар тыа хаһаайыстыбатын көрдөрүүтэ биллэрдик мөлтөөбүтэ. Билигин ол түмүгэр өрөспүүбүлүкэ үрдүнэн саамай элбэх хаарбах туруктаах оскуолалаах, уһуйааннаах, култуура кииннээх улуус буолабыт.
Бу депутаттыыр кэмигэр кини улууспут сүрүн тэрээһиннэригэр уонна дьон-сэргэ кыһалҕатын быһаарыыга кыттыспата. Уһуну-киэҥи көрбөккө, бэйэтин эрэ иннин көрүнэн дьон санаатын бутуйарга эрэ элбэх хобу-сиби интернет нөҥүө тарҕатарын эрэ көрө-истэ олордубут. Түгэн үөскээтэҕинэ, депутат киһи бэйэтин улууһун интэриэһин бигэтик тутуһуохтаах этэ, биһиги оннук өйөбүлү ылбатыбыт. Билигин Ил Түмэн 7-с ыҥырыытын болдьоҕун икки хаалбыт сылыгар биһиги, Үөһээ Бүлүү улууһун олохтоохторо, кыахтаах, эрчимнээх, үөрэхтээх уонна улууспут сайдыытыгар чахчы күүскэ үлэлэһэр киһини депутатынан таларга бэлэммит», — диэн суруйар олохтоох.
Ил Тумэн