«Үйэлээх чороон — өбүгэм ситимэ» — саҥа бырайыак!

Арассыыйаҕа — Норуоттар сомоҕолоһууларын, Саха сиригэр — Култуура сылларынан эһиэхэ, ааҕааччыларбытыгар анаан, «Үйэлээх чороон — өбүгэм ситимэ» бырайыагы саҕалыыбыт.

Бу бырайыакка биһиэхэ өрүүтүн көмөлөһөр, тирэх буолар, өйүүр өрөспүүбүлүкэбит музейдара дьон-сэргэ көрүүтүгэр туруорар былыргы уонна ураты чорооннорун видеонан көрдөрүөхтэрэ, кэпсиэхтэрэ. Маны сэргэ, сүбэни-аманы биэрэр, көмөлөһөр гуманитарнай чинчийии институтун наукаҕа үлэһиттэрэ, «Симэх» норуот ускуустубатын уонна уус-уран оҥоһуктарын Национальнай киинин исписэлиистэрэ, Олоҥхо тыйаатыра, «Чороон» норуот уус-уран оҥоһуктарын харыстыырга уонна киэҥник тарҕатарга үлэлэһэр Киин бу тиэмэҕэ дьон-сэргэ, кэнчээри ыччат туһугар үйэтитиигэ үлэлэрин, суруйууларын эһиэхэ анаан таһааран, ааҕааччы киэҥ араҥатыгар билиһиннэрэн иһиэхпит. Үйэтитиигэ аныыр ураты интэриэһинэй үлэлэрэ болҕомтоҕутун тардыахтара диэн эрэнэбит.

Онтон сайын музейдар кыттыылаах чорооҥҥо анаммыт быыстапка Ем. Ярославскай аатынан Хотугу норуоттар историяларын уонна култуураларын холбоһуктаах Саха судаарыстыбаннай музейыгар ыытыллыаҕа. Манна улуус-улуус аайыттан бар дьон көрүүтүгэр анаан аҕалыллыбыт чороон арааһын көрөр кыахтаныаххыт.

Элбэх киһи, бука, чорооммут хас көрүҥнээх эбитий? Туох ойуулаах-мандардаах буоларый? Бу чороон хаһан, хантан көстүбүтүй? Музейга ким биэрбитий? Баҕар, бу кыраһыабай бэйэлээх чочуонай чороону ким оҥорбута биллэрэ буолаарай? Онтон да атыны толкуйдуургутун, саныыргытын, билиэххитин баҕараргытын саарбахтаабаппыт.

Бүгүн Ем.Ярославскай аатынан хотугу норуоттар устуоруйаларын уонна култуураларын холбоһуктаах судаарыстыбаннай түмэлин этнографияҕа секторын сэбиэдиссэйэ Василий Васильевич Попов чороон туһунан кэпсиирин манна көрүҥ. Кини тугу тоһоҕолоон бэлиэтиирий? Этэрий?

Бэчээккэ бэлэмнээтэ Сардаана Баснаева

Маны сэргэ, «Сэдэх экспонаттарга» тахсыбыт кэтэрдии атахтаах чороон туһунан бу сигэнэн киирэн көрүөххүтүн сөп: https://edersaas.ru/sedeh-eksponattar-video/

УлуусМедиа