«Уйбаан Уһунуускай — уһулуччулаах суруналыыс убайым». Николай Кривошапкин ахтар-саныыр

Бүгүн, ыам ыйын 5 күнүгэр, Бэчээт дьиэтигэр «Иван Ушницкай эйгэтэ» диэн талааннаах суруналыыс, суруйааччы, биллиилээх уопсастыбаннай-политическэй деятель сырдык кэриэһигэр быыстапка арыллар. Бу бэлиэ күҥҥэ — Сэбиэскэй бэчээт күнүгэр кини төрөөбүтэ 65 сылын туолла.

Иван Петрович олоҕун тухары үгүс көлүөнэ эдэр суруналыыстары кытта чугас, иһирэх сыһыаны олохтоон, өрүүтүн өйдөһөр-өйөһөр, истиҥник доҕордоһор ураты дьоҕурдааҕа. Оннук айар эйгэҕэ оҕо эрдэҕиттэн эрэммит талааннаах ыччаттарыттан биирдэстэрэ Николай Кривошапкин буолар. Кини Иван Петровиһы «уһулуччулаах суруналыыс убайым» диэн үтүө тылынан ахтар:

«…Мин Иван Ушницкайдыын кини «Орто дойду сонуннара» хаһыаты тэрийиэҕиттэн чугастык билсэн барбытым. Оччотооҕу 10 кылаас үөрэнээччитэ кинилэргэ суруйан саҕалаабытым. Дьиҥэр, республика бары кэриэтэ таһаарыыларыгар хото бэчээттэнэр этим да, аны, итиннэ эмиэ матырыйаалларбын хайаан да ыыттахпына сатаныах курдуга.

Устудьуоннуур эрдэхпинэ бэйэм аатым-суолум сэргэ Дьол Кривошапкин, Николай Федосеев диэн илии баттыырым. Республика сүрүн хаһыатын салалтата — «саха сирдэрэ» өйөөн, дуогабарынан хамнас ыла олорон, тэҥҥэ атын таһаарыыларга суруйар суобаспар да, санаабар да соччото суох быһыыга холооннооҕо.

Айар киһиэхэ иитии-такайыы, үөрэтии-уһуйуу диэн буолбакка, чуумпу эрэл, саҥата суох өйөбүл, көстүбэт көҥүлүнэн күндүлээһин тыынар салгын тэҥэ олус наада. Ону толору эҕирийэр кыаҕы Иван Петрович биэрэр этэ.

…Иван Петровиһы мин куруук балай эмэ саастаах киһи тэҥэ ылынарым. Дьиҥэр, ийэбиттэн икки эрэ сыл аҕа буоллаҕа. Халыҥ ачыкыта уонна, суруналыыстыкаҕа атаҕын тумсун эрдэ укпут буолан дуу, олоҕун далааһына киэҥэ, суруйар ыыра ырааҕа бэрдиттэн эбитэ дуу, «былыр үйэттэн» айарга-тутарга дылыта.

…Мин олохпор ордук махтанарым диэн — оҕо эрдэхпиттэн норуоппут үгүс бэлиэ дьоно сүрэхтиин-быардыын арыллан, өйдүүн-санаалыын тардыһан, дьылҕа умсугутуулаах да, уустук да өрүттэрин бигэргэтэрдии, итэҕэтэрдии, чугастык, истиҥник алтыһан, үгүстэрэ доҕордуу сыһыаҥҥа киирэн, эмиэ да уйаны-хатаны чиҥэтэр мындыры иҥэрэр, эмиэ да туох эрэ суолталааҕы өйдөтөр дьайыыны оҥорбут үтүө түгэннэригэр…

Оннук сырдык эйгэлээх сомоҕо талаан дьон кэккэтигэр уһулуччулаах суруналыыс убайым Иван Ушницкайы киллэрэр кыахтаахпын», — диир «ҮЙЭ» республикатааҕы сурунаал төрүттээччитэ, сүрүн редактора Николай Кривошапкин.

УлуусМедиа