Сааскы халаан: Өлүөнэ көмүөлүн алын кирбиитэ Саха сиригэр киирэрэ 10-ча көс хаалла
Росводресурс Өлүөнэ өрүс тардыытынааҕы ууга салалтатыттан иһитиннэрэллэринэн, бу дьыл ыам ыйын 9 күнүнээҕи туругунан, Өлүөнэ өрүскэ көмүөл алын кытыыта Иркутскай уобалас Визирнэй бөһүөлэгин туһаайыытынан хамныыр.
Итинтэн биһиги өрөспүүбүлүкэбит быысаһар сирэ 10-ча көс хаалла. “Витим – Ленскэй” учаастагар муус үрдүнэн уу халыйда уонна ырбыы таҕыста. Уу суукка иһигэр 31-55 см эбилиннэ. Чугастааҕы күҥҥэ Витим уонна Пеледуй икки ардыгар муус хамсыыра күүтүллэр.
Нүүйэ үрэх “Куомака – Бэчинчэ” учаастагар муус уста турар.
Өлүөхүмэ үрэххэ Куду Күөл сэлиэнньэтин аннынан кылгас кэмҥэ харыы тахса сырытта. Онтон көмүөл “чөлүгэр түһэн”, уста турар. Өлүөхүмэ үрэх төрдүгэр муус хамныыр.
Алдан өрүскэ Уус Миль уонна Петропавловскай икки ардынааҕы учаастакка муус уста сытар. Уу таһыма сууккаҕа 14-36 см үрдэээтэ.
Амма өрүскэ муус алын кытыыта Чурапчы улууһун Мындаҕаайы сэлиэнньэтиттэн аллараа сүүрүккэ айаннаан иһэр.
Халыма өрүс Магадан уобалаһын сиригэр-уотугар бу ый 16-18 күннэрин эргин эстэрэ сабаҕаланар.
Василий Никифоров
Поделиться в MAX ледоход