Уус бэлиэтээбит чорооно

«Үйэлээх чороон — өбүгэм ситимэ» — бырайыак

Аммаҕа улуустааҕы историяны уонна кыраайы үөрэтэр музейыгар түөрт тыһыынчаттан тахса  экспонат хараллан турар.

— Музейбытыгар уопсайа 16 чороон баар. Олортон үс чороону быһыытыттан, ойуутуттан көрдөххө, иккитэ XIX үйэҕэ, биир XX үйэ саҕаланыытыгар оҥоһуллубут буолуохтарын сөп. Хомойуох иһин ким туттарбытын уонна уус аата-суола, ким оҥорон, чочуйан таһаарбытын туһунан сурук суох.

Бэлиэ чороонунан буолар атаҕын анныгар 4 сиринэн уус бэлиэ оҥорбут уонна латыынныы алпаабытынан 2 буукубалаах. Бэлиэтэ — үүнээйи, үүнэ турар мас курдук ойуулаах. Онтон буукубалара  “Nf” диэн көстөллөр.

Бу бырайыагы көрөөччүлэр, уран тарбахтаах уустар, чороону чинчийэн үөрэтээччилэр, музей үлэһиттэрэ маннык бэлиэни, баҕар, атын малга көрбүт буолуохтарын сөп. Ону биллэриэхтэрэ диэн эрэнэбит, — диэн этэр Вера Геляриевна Шилова.

Видеоҕа уһулла, хаартыскаҕа түһэрдэ түмэл электроннай баазаларын эрэдээктэрэ Иван Новиков. Чороон туһунан кэпсээтэ түмэл салаатын салайааччыта Вера Шилова.

Маны сэргэ, Амма улууһун историяны уонна кыраайы үөрэтэр музейын сэдэх экспонаттарын туһунан манна көрүөххэ сөп: https://sakha-sire.ru/sedeh-eksponattar-122-syllaagyta-becheettemmit-kinige-video/

Бэчээккэ бэлэмнээтэ Сардаана Баснаева

УлуусМедиа