Бэс ыйынааҕы «Чолбон»: Туймаада ыһыаҕын кэпсээннэрэ, Иван Арбита дьылҕата

Бэс ыйынааҕы нүөмэргэ кэрэхсээҥ:

«Хотугу сулус» уонна «Полярная звезда» сурунааллар алтыһыыларын историятын холбоһуктаах эрэдээксийэ 1964–1967 сыллардааҕы бас эрэдээктэрэ Дмитрий Кириллин «“Чолбон” сурунаал нууччалыы аргыһа» ыстатыйатыгар;

«“Чолбон” айар кыһата» бырайыак «Туймаада ыһыаҕын кэпсээннэрэ» түһүмэҕэр төрүт үгэс уонна глобализация, үйэлээх таптал уонна күрэс былдьаһыы туһунан Ульяна Захарова «Алтан симэх», Светлана Егорова «Кэлэр кэм илдьитэ», Мааны Маарыйа «Батас Боотур», Федор Павлов «Оҕо Охонооску уонна сыллааҕы дьаһаах», Сардаана «Тиийиэм дуо…» айымньыларын;

Аҕа дойду Улуу сэриитин кыттыылааҕа, суруйааччы Семен Никифоров ханна да бэчээттэммэтэх соҕотохсуйуу уонна таптал туһунан «Тулаайах туруйа», «Туллукчаан» диэн ханна да бэчээттэммэтэх кэпсээннэрин;

норуот суруйааччыта Куорсуннаах репрессия холоругар сөрөнөн ыар дьылҕаламмыттар туһунан «Өлөксөөс» сэһэнин;

уостан түспэт ырыалар тылларын суруйбут поэт Семен Капитонов 75 сааһын көрсө «Эн үүнүүй, Сардаана, үйэ саас…» диэн урукку уонна саҥа хоһооннорун бөлөҕүн;

поэт Арчылан «Дьол дьоруота баар дииллэр» диэн хоhооннорун бөлөҕүн;

Крым татаардарын дьылҕаларын уонна үгэстэрин ойуулуур суруйааччыта Гульнара Усеинова «Лиля уонна саз» кэпсээнин Лилия Иванова тылбааһыгар;

«Хоту улуустарга айар экспедиция» бырайыак чэрчитинэн «Чолбоннор» Дьааҥыга мүччүргэннээх сырыыларын туһунан Утум Захаров суоллааҕы бэлиэтээһиннэрин саҕаланыытын;

ини-бии саха саарыннара – тыа хаһаайыстыбатын салайааччы Федор Иванов, бар дьонугар Уйбаан Баанньа диэн аатынан биллибит суруналыыс Иван Иванов, геолог уонна суруйааччы Константин Гурьев, культура деятелэ Виктор Кузьмин дьылҕаларын туһунан аймахтара суруйааччы Анатолий Слепцов «Түөрт бииргэ төрөөбүт саха чулуута» ыстатыйатын;

саха поэзиятыгар ураты суолу хаалларбыт киһи олоҕун биллибэт өрүттэрин арыйар, сиһилиир Рустам Каженкин «Иван Арбита. Үс төгүл муҥурданыы» суруйуутун;

«Саһыл уонна сыалыһар» диэн эскимос остуоруйатын Георгий Борисов тылбааһыгар.

Күн – сири, «Чолбон» – саханы сырдатар.

УлуусМедиа