Тарбаахап сандалы бэрэскитэ
Саха аатырбыт асчыта Иннокентий Тарбаахап ырысыабынан бэрэски астыыбыт.
12 устуукаҕа: бурдук – 1 кг, сүөгэй – 300 г, үүт – 100 г, суода – 10 г, сымыыт – 2 уст., туус.
Фаршыгар: убаһа этэ – 900 г, хаһа – 150 г, рис – 100 г, мас арыыта – 300 г, туус, хара биэрэс, луук.
Сүөгэйгэ үүтү, сымыыты, тууһу уонна суоданы кутан ытыгынан ытыйан баран, сиидэлэммит бурдугу кутан сымнаҕас, киһи илиитигэр сыстаҥнаабат тиэстэ оҥоһуллар. Тиэстэни 15-20 мүн. туруора түһүллэр.
Убаһа этин быһаҕынан кыра гына кырбаныллар. Хаһаны кыра гына кырбаан баран, эриэппэ луугу кытта буһара ууруллар. Сиикэй фаршка буспут риһи, хаһаны, тууһу, биэрэһи кутуллар.
Бэлэм тиэстэни 12 өлүүгэ арааран, чараас гына төгүрүк буолуор диэри бөлүөгүнэн тэнитиллэр. Тэнитиллибит тиэстэҕэ биир өттүгэр фаршы ууран тиэстэ нөҥүө өттүнэн бүүрүктүү тутуллар. Кытыытынан саптыы хата ойуу оҥоһуллар эбэтэр биилкэ тиистэринэн баттанар.
Хобордооххо икки өттүн эргитэ сылдьан буһарыллар. Бу бэрэскини кытары пиалаҕа эти уонна хоргуннаах миини биэрэр ордук табыгастаах. Бэрэскини ууллубут ынах арыылаан сиэххэ сөп.
Иннокентий Тарбахов
«Өбүгэ алгыстаах аһа» кинигэтиттэн,
«Эҥсиэли» хаһыат
Поделиться в MAX