Ойуур уота: ардахтатар сөмөлүөт бүгүн Амма, Алдан, Өлүөхүмэ үрдүлэринэн үлэлиэҕэ

От ыйын 13 күнүн сарсыардатыгар ойуур уотун умуруорууга Авиалесоохрана 431 десантник-баһаарынайа уонна Якутлесресурс 214 үлэһитэ 23 анал тиэхиньикэлээх охсуһа сылдьар.

Саамай элбэх уонна улахан уот Уус Маайа тыатыгар күүдэпчилэнэр. Бу улуус сиригэр-уотугар от ыйын 11 күнүттэн ыксаллаах быһыы-майгы эрэсиимэ биллэриллибитэ. Манна түөрт сиргэ 324, 229, 59 уонна 4 гектардыы иэннээх ойуурга тэнийбит баһаардары кытта охсуһаллар.

Эдьигээҥҥэ 18 гектар, Чурапчыга икки сиргэ гектар аҥаардыыта, Тааттаҕа 1 уонна 20, Аммаҕа 184 уонна 60, Томпоҕо 1 076 уонна Кэбээйигэ 59 гектар иэннээх уоттары бохсор иһин үлэлииллэр.

Тааттаҕа 25 уонна 4 871, Алдаҥҥа 195, Намҥа 0,3, Уус Алдаҥҥа 2,5, Хаҥаласка 35, Мэҥэ Хаҥаласка 27, Аммаҕа 1, Өлүөхүмэҕэ 7 гектардыы иэннээх уоттары эргийдилэр.

Аммаҕа 23, Уус Алдаҥҥа 1,5 уонна Дьокуускай куорат тыатыгар 0,7 гектардыы иэннээх уоттары саба туттулар. Нэһилиэнньэлээх пууннартан тэйиччи, суола-ииһэ суох сиргэ Томпоҕо 12 137, Орто Халымаҕа 5 108 гектардыы иэннээх ойуур уоттарын бохсууга туһааннааҕынан 9 уонна 36 десантник-баһаарынай туруулаһа сылдьаллар.

Манна сыһыаран суруйдахха, “Полярные авиалинии” хампаанньа “Атмосфера” Ан-26 зондировщик-сөмөлүөтэ сөҥүү түһэрин күүһүрдэр үлэтин иккис түһүмэҕин саҕалаан, от ыйын 10 күнүгэр Нам, Хаҥалас, Мэҥэ Хаҥалас, Уус Алдан улуустарын уонна Дьокуускай куорат, от ыйын 11 күнүгэр илин эҥээрдээҕи улуустар үрдүлэринэн көтүүлэри оҥордо. Бүгүн күнүс Алдан, Өлүөхүмэ уонна Амма хайысхаларынан үлэлии көтөрө күүтүллэр.

Василий Никифоров

Хаартыска: Авиалесоохрана

УлуусМедиа