Үүтү тутуу: 6 улуус сыллааҕы былаанын аҥаарын аһарда
Хаһаайыстыбаларга үүттүгэннээх кэм үгэнэ. Быйыл үүт соҕотуопката ааспыт сыллааҕы тэтиминэн баран иһэрин улуустартан от ыйын 15 күнүгэр түмүллэн, бүгүн чуолкайдаммыт отчуот көрдөрөр. Ол курдук, былырыын бу кэмҥэ соҕотуопкаламмыттан 8,58 туоннанан чорбойон, 27533,21 туонна ыаммытынан үүт тутулунна, эбэтэр сыллааҕы былаантан 46,04 бырыһыана.
Барыта 19 улууска уонна Дьокуускай куорат уокуругар 56 тэрилтэ үүтү тутар уонна учуоттуур. Улуустарынан тэҥнээтэххэ, сыллааҕы былааннарын Ленскэй 63,3, Өлүөхүмэ 61,6, Мииринэй 58,5, Сунтаар 57,5, Мэҥэ Хаҥалас 50,5, Хаҥалас 50,1, Бүлүү 49,2 бырыһыанныытын толорон, инники күөҥҥэ иһэллэр. Оттон Таатта 35, Амма 36, Үөһээ Дьааҥы 33,3 бырыһыаннаах хаалыылаахтар кэккэлэригэр сылдьаллар.
Санаттахха, быйыл өрөспүүбүлүкэ бүддьүөтүттэн ынах үүтүн оҥорон таһаарыыны өйүүргэ уонна үүтү соҕотуопкалааһыны хааччыйарга анаан 3,7 млрд солкуобай кээмэйдээх үбүлээһин көрүллэн турар. Ити үп 53 тыһ. туонна үүтү тутарга сөп буолар. Оттон Тыа хаһаайыстыбатын социальнай-экэнэмиичэскэй сайдыытын бырагырааматыгар бигэргэммит субвенция кээмэйинэн уонна Ил Дархан сорудаҕынан 65,7 тыһ. туонна үүт тутуллуохтаах. Онон 12,7 тыһ. туонна үүт соҕотуопкаланарыгар бүддьүөттэн эбии 907,7 мөл. солкуобай эрэйиллэр.
Тыа хаһаайыстыбатын уонна ас-үөл бэлиитикэтин министиэристибэтэ иһитиннэрэринэн, бу кэмҥэ бүддьүөттэн көрүллүбүт үптэн 58 бырыһыана, 2,122 млрд солкуобай, субвенция быһыытынан муниципальнай тэриллиилэргэ тиксэриллибит.
Василий Никифоров
Иван Лукин хаартыскаҕа түһэриитэ, «Эркээйи»
Өссө ааҕыҥ: Сэлээркэ эрэ сэниэлээхтик бэрилиннэр, былааннаах отторун бэлэмнииргэ эрэллээхтэр Поделиться в MAX заготовка молокаСельское хозяйство