Мария Бродникова: “Балыктааһын – биһиги үлэбит”
Биллэр блогер Вячеслав Бродников кэргэнэ Мария «Клевая рыбалка» диэн устар-көрдөрөр ханаалларыгар дьарык курдук сыһыаннаһан балыктыылларын туһунан Улус.Медиа ааҕааччыларыгар кэпсиир.
— Мин Үөһээ Дьааҥыга Сартаҥҥа төрөөбүтүм, улааппытым. Онон оҕо сааһым Дьааҥы өрүс салаата Сартаҥ диэн хайа үрэҕин кытылыгар ааспыта. Үрэхпит дьарҕаа, быйыт, бил балыктарынан баай.
Аҕам, убайдарым уонна бырааттарым бары саха эр дьонун сиэринэн бултууллар, балыктыыллар. Инньэ гынан балыктааһыны кыра эрдэхпиттэн билэбин эрээри, аһара үлүһүйбэтэҕим.
Тоҕо диэтэххэ, биһиэхэ хоту, сүрүннээн, сайын балыктыыллар, оттон сайыммыт олус кылгас. Утарытынан айахха сиири эрэ илимнээн ылааччылар. Онтон элэс гынан ааһар сайыҥҥы күннэри үлүмнэһэн, от үлэтэ саҕаланар.
Бэйэм ыал буолан баран биирдэ дьарык курдук сыһыаннаһан балыктыыр буолбутум. Кэргэним Вячеслав Бродников блогер-балыксытынан биллэр, социальнай ситимнэринэн тарҕанар “Клевая рыбалка” диэн бэйэтэ устар-көрдөрөр ханааллаах. Этэргэ дылы, кимниин бодоруһаҕын – оннук идэлэнэҕин.
Балыктааһын – биһиэхэ үлэбит. Вячеслав Саха сирин ийэ айылҕатын, хоту хайдах балыктыылларын, балыктан тугу астыылларын көрдөрөр. Мин киниэхэ көмөлөһөн, илии-атах буолабын, хаамыраҕа устабын, ардыгар сюжеттарын таҥабын. Онон балыкка наар бииргэ сылдьабыт, ыйы-ыйынан тыаҕа олоробут, арай, тоһуттар тымныыга эрэ дьиэбит түөрт эркинигэр хаайтарабыт.
Бастакы бөдөҥ трофейбын – 10 киилэ 250 кыраамнаах сордоҥу 2024 сыллаахха кулун тутарга хаптарбытым. Эмиэ иккиэн Өлүөнэ өрүскэ балыктыы бардыбыт. Балаакка туруорунан, оһохпутун отуннубут. Вячеслав сарсыарда наһыам (жерлица) туруоран баран, Бүрээтийэттэн кэлбит ыалдьытын көрсө бөһүөлэккэ таҕыста.
Ол кэмҥэ мин бэйэм страницабар анаан контент устаары, хаамырабын уурарбын кытта наһыам былааҕа хамнаата. Маннык ньыманан мин балыктыы илик буоламмын, маҥнай уолуйан хаалан, көрөн олордум. Катушка леската олус күүскэ, эрчимнээхтик сыыйыллан барда.
Тугу даҕаны гымматахха, балык куотуон сөбүн өйдүүбүн. Ол иһин сыгынньах илиибинэн лесканы харбаан ылан, төттөрү тартым. Балык куотаары эмискэ мөхсүбүтүгэр леска тарбахпын дьуккурутта эрээри, хата, 1,2 мм суоннаах буолан, тириибин быспата.
Олус күүстээх балык түбэспитин билэн, кыайыа суохпун диэн суос бэринэн, кэргэним кэлэрин күүтэр санаа күлүм гынан ааста. Ол гынан баран, икки чааһы быһа лесканы тардан турар айакката бэрт буолсу.
Вячеслав наһыамҥа түбэспит сордоҥу ойбонтон хайдах хостуурун санаан кэллим уонна лескабын холкутатан, төттөрү ыыта-ыыта, тардыалаатым. Оччоҕуна сордоҥ сылайар. Ол эрээри, бэйэм кытта дэлби эһинним, 40-ча мүнүүтэни быһа мөҕүстэҕим. Сүүскэ кэтиллэр банаарбын ылан, ойбону тыктарбытым – олус улахан харах көһүннэ!
Арба, ол кэмҥэ муус 1,5 миэтэрэ халыҥнааҕа. Оччо дириҥ көҥкөлөй нөҥүө көстүбүт хараҕы билиҥҥэ диэри умнубаппын.
Онтон булчут хааным уһуктан, лескабын холкутата-холкутата тардыалаан, сордоҥ төбөтүн ойбоҥҥо угар түгэнин таба туттум. Ойбон түгэҕэр сытыы тиистэрдээх олус улахан айах көһүннэ. Оһох чоҕун тардар күрүүкэни ылан, сыҥааҕыттан баҕыырдаан таһаардым. Хайдах бачча улахан балыгы ойбонтон ороон таһаарбыппын бэйэм даҕаны итэҕэйбэтим.
Кэргэним ыалдьытынаан мин соҕотоҕун олус улахан сордоҥу хостообуппун көрөннөр, сөхпүттэрэ. Искэҕэ наһаа элбэх этэ. Миискэҕэ тууһаан, ыалдьыппытыгар амсаппыппыт.
Оттон сордоҥу бэйэтин тоҥорон, Вячеслав бииргэ үлэлиир дьахтара эрдэттэн үлэспитин толорон, күндүлээбиппит. Кини балык этиттэн бэлимиэни кытта астыыр буолан, улахан сордоҥтон аһара астыммыта.
Ол ыйааһынынан мин бастакы бөдөҥ трофейым гынан баран, дьиҥнээх булдум иннибэр күүтэр, сотору кэминэн хайа үрэхтэригэр аарыма били хаптарыам дии саныыбын.
Биһиги үлэбитин дьахтар уонна эр киһи киэнэ диэн араарбаппыт. Сүрүнэ, айылҕа сокуонун кэһимиэххэ, иччилэргэ ытыктабыллаахтык сыһыаннаһыахха, хас биирдии бултаммыт балык иһин махтаныахха. Саҥа саҕалыыр балыксыттарга ситиһиини баҕарабын.
Ситиһии ырааҕа суох, өскөтүн айылҕаны таптыыр, балыктааһыны аралдьыйар-саатыыр дьарык оҥостубакка, булка курдук боччумнаахтык сыһыаннаһар буоллахха.
Мария БРОДНИКОВА
Хаартыскалар дьиэ кэргэн архыыбыттан ылылыннылар