Горнайга Кытай оҕолоро тыа сирин олоҕун кытары билистилэр
Ааспыт нэдиэлэҕэ улуус дьаһалтатыгар СӨ Дьоҕус билим академиятын ректора Василий Павлов, Гонконг университетын профессора Патрик Ламм салайар бөлөҕө Горнайга ыалдьыттаата. Бөлөҕү Маҕараска Лука Харитонов аатынан оскуола кэлэктиибэ сиэр-туом быһыытынан кымыстаах алаадьынан көрүстүлэр. Оҕолор сайылыкка сылдьан, ньирэй аһатан, күөрчэх ытыйан, саха омугун култууратын кытары билистилэр. Бу туһунан «Үлэ күүһэ» хаһыат кэпсиир.
Бэрдьигэстээххэ улуус баһылыгын бастакы солбуйааччыта Сардаана Стручкова кытары көрүстүлэр. Кытай биир бастыҥ университетын устудьуоннара Саха сиригэр бастакы сырыылара буолбатах. Биһиги дойдубутун кытары ыкса үлэлэспиттэрэ хаһыс да сыла. Патрик Ламм Горнайга бастакы сырыыта буолбатах эбит. Хас ды сыллааҕыта кэлэ сылдьыбытын үөрэ-көтө кэпсээтэ. Саамай ыалдьытымсах дьоннор манна бааллар, диэн астына аҕынна.
Быйыл Кытай норуота Сэбиэскэй Сойууһу кытары, доҕордоһуу туһунан сөбүлэҥ түһэрсибиттэрэ 77 сылын бэлиэтиир эбит. Патрик Ламм бэлиэ сыл чэрчитинэн үгүс элбэх тэрээһиннэр ыытыллалларын кэпсээтэ. Саха сирин уонна Кытай оҕолоро хардарыта билсэллэригэр, үөрэнэллэригэр СӨ Дьоҕус Билим академията улахан болҕомтону уурарын махтана эттэ.
Кытай үөрэҕириитин бөлөҕө Саха сиригэр кэлэн, элбэҕи билэр. Бэйэлэригэр саҥаны арыйаллар. Тыа сирин олоҕун-дьаһаҕын, сөҕө-махтайа көрөллөр. Кинилэргэ барыта сонун. Ыаммыт үүт, тыаҕа үүнэр дьэдьэн минньигэс амтанын астына кэпсииллэр. Улууспут историятын бэрт болҕомтолоохтук истэллэр-көрөллөр. Сахалыы таҥас кэтэннэр, хаартыскаҕа түһэннэр дьонноругар-сэргэлэригэр ыытан, үөрүүлэрин үллэстэллэр.
Гонконг университетын бөлөҕөр тылбаасчыт быһыытынан, биир дойдулаахпыт Ирина Баишева сылдьар. Кини улуустааҕы гимназияны кыһы көмүс мэтээлинэн 2023 с. бүтэрбит. Харбин университетын IV кууруһун устудьуона. Горнай кыыһа үөрэнэргэ бары усулуобуйа баарын үөрэ-көтө кэпсиир. Бастакы эрэ сылларга уустуктары көрсүбүтүм диэн ахтар. Кэлин үөрэнэн, олохсуйан, дьонун-сэргэтин кытары алтыһан, холкутук сылдьабын диир.
Улууспут историятын, сайдыытын тас дойдулартан кэлэн, көрөн-истэн, үтүө тылларынан ахтан, киэҥ сиргэ үтүө тылларынан кэпсии-ипсии сылдьалларыгар саарбахтаабыппыт.
Вячеслав Алексеев
Поделиться в MAX