Бүгүн сарсыарда 12 улуус тыатыгар 72 уот умайар

Уот уоскуйар санаата суох. Ааспыт нэдиэлэҕэ кураан куйаас күннэр тураннар, көрдүгэннэр өссө сэтэрээтилэр. Көтөр ааллары туһаныы уонна куйаартан кэтээн көрүү түмүгүнэн, 15 саҥа ойуур уота булулунна.

Көрдүгэннэр барыта 8 улууска – Аммаҕа, Уус Маайаҕа, Ньурбаҕа, Сунтаарга, Мииринэйгэ, Өлөөҥҥө, Эдьигээҥҥэ, Өймөкөөҥҥө көһүннүлэр. Ааспыт күннэргэ “Авиалесоохрана” тэрилтэ 18 лесничество сиригэр 15 салгын аалын көтүттэ. Ону сэргэ “Якутлесресурс” тэрилтэ 23 лесничествоҕа сиринэн патруллааһыны тэрийэн ыытта.

Уоту уодьуганнааччылар 3 улууска (Аммаҕа, Намҥа уонна Өлөөҥҥө) 25 304,5 гектардаах тыаны сиэбит 10 ойуур уотун хаптаттылар.

Бүгүн сарсыардааҥы иһитиннэриинэн, 12 улуус (Алдан, Амма, Үөһээ Бүлүү, Эдьигээн, Кэбээйи, Мииринэй, Ньурба, Өймөкөөн, Өлөөн, Орто Халыма, Сунтаар, Уус Маайа) сиригэр 353 805 гектарга тэнийбит 72 ойуур уота баар. Баһаарынайдар билигин Амма, Мииринэй, Кэбээйи, Өлөөн, Орто Халыма, Уус Маайа улуустарыгар 78 788 гектар иэннээх 7 уоту умуруорууга үлэлииллэр. Ити иһигэр Аммаҕа уонна Орто Халымаҕа 46,7 тыһ. гектардаах 2 уоту эргийдилэр.

Уоту кытта охсуһууга 333 киһи 36 тиэхиньикэлээх үлэлээтэ. Эрэгийиэн таһымыгар ыксаллаах быһыы-майгы эрэсиимэ от ыйын 10 күнүттэн үлэлиир. Оттон муниципальнай суолталаах ыксаллаах быһыы-майгы бу кэмҥэ Кэбээйи уонна Өлөөн улуустарыгар салҕанан барар. Быйыл сайын ойуурга уот турар кутталлаах кэмиттэн барыта 467 725,3 гектар иэннээх 454 ойуур уота бэлиэтэннэ.

Василий Никифоров

Хаартыска: Арассыыйа ыксаллаах быһыы-майгы министиэристибэтин Саха сиринээҕи кылаабынай управлениетын пресс-сулууспата

УлуусМедиа