Уордьаннаах Уйбаан ыччаттара кыралыын-улаханныын окко туруннулар

Уһун унньуктаах алдьатыылаах ардахтар тохтоон, сайыҥҥы итии күннэргэ Дьаархан нэһилиэгэр от үлэтэ күргүөмнээхтик барар. Бэлиэр оттоон бүппүт ыаллар бааллар. Бу туһунан «Сунтаар сонуннара» суруйар. 

Дьаархан биир бастакы мэхэньисээтэрэ Иван Прокопьевич Семенов-Уордьаннаах Уйбаан ыччаттара — нэһилиэк элбэх оҕолоох сис ыаллара Виктор Семенов, Анатолий Григорьев, Наталья Семенова, Алексей Семенов оҕолорунаан, сиэннэринээн оттуу сылдьалларын ааһан иһэн киһи үөрэ-астына көрөр.

Ол курдук, сарсыарда 9 чаастан бары хомуллан ходуһаҕа күргүөмнээхтик киирэллэр. Бу манна уһуйаан саастаах уолаттар Айтал, Айастаан Тимофеевтартан саҕалаан оскуола алын, орто кылаастар үөрэнээччилэрэ от үлэтигэр төһүү күүс буоланнар, оҥоойуга-бырдахха, сыралытар күн уотугар кыһаммакка күүс-көмө буолаллар.

Кирилл, Вася Петровтар (быйыл Кирилл 6-с, Вася 7-с кылааһы бүтэрдилэр) Сунтаартан кэлэн, сылын ахсын оттоһор уопуттаах отчуттар. Ол курдук, уолаттар от үлэтин барытын сатыыллар. Тиэхиньикэҕэ да сыстаҕастар. Мунньааччылар бары оҕо аймах дьон —  эдьиийдэрэ  Наталья Семенова салалтатынан биир да салаа оту хаалларбакка мунньаллар, бугуллууллар. Тимур Стручков (8-с кылаас) эмиэ Сунтаартан кэлэн, улахан отчут ахсааныгар сылдьар. От кээһиитигэр биир тутаах үлэһит. 7-с кылааҺы бүтэрбит Аллараа Бэстээхтэн сайылыы кэлбит Ньургун Колосов солбуллубат от түстээччи.

Бу күүстээх отчуттар кураан күннэри баттаһа 16 оту чөкөппүттэр.

Отторун кээһэ сылдьалларын көрөн тохтоон, хаартыскаҕа хатаан аастым, бу күн сорохторо Сунтаарга киирбит буоланнар хамаанда аҥаара эрэ турар.

Бу курдук үлэни өрө тутар Уордьаннаах Уйбаан оҕолоро, сиэннэрэ, хос сиэннэрэ ходуһа хоһуун отчуттара буолаллар…

Павел Кырелов

УлуусМедиа